Promovimi i librit dhe shumë aktivitete gjatë këtij viti

Zvicra

Promovimi i librit dhe shumë aktivitete gjatë këtij viti

Më: 28 nëntor 2022 Në ora: 21:03
Nga e majta: Xholec Deda, Agim Alaj, Saim Tahiraj, Nue Zalli, Fadil Haxhosaj

Kryesia e shoqatës “Nënë Tereza” në Zvicër, ka bërë një përmbledhje të aktiviteteve që janë zhvilluar gjatë këtij viti, duke nxjerrë konstatime se kishte gjallëri në aktivitetet e saja. Ndërsa vëmendje më e madhe ishte në botimin e librit monografi “Mes luftës e paqes”, si dhe promovimin që u mbajt para publikut në Kosovë, pikërisht në Prishtinë. Mbledhja e mbajtur me 27 nëntor, 2022, në prag të Ditës së Flamurit, duke uruar gjithë popullin shqiptarë, me synime për unitet dhe kremte me mirëqenie dhe stabilizim ekonomik e politik ndër trojet tona shqiptare.

Kryetari i shoqatës, Nue Zalli, bëri një varg prezantimesh të punëve që janë kryer gjatë këtij viti, me theks të veçantë rreth botimit të monografisë, për të cilën janë angazhuar kryesia dhe aktivistë tjerë që kanë udhëhequr shoqatën nëpër vite duke kontribuar në disa mënyra për ta parë dritën e botimit. Zalli - theksoi se ishte kjo dhe një përpjekje e shoqatës se kemi kapacitet edhe më tej të mbajmë platformën e statutit për të cilën jemi themeluar, por edhe të pasqyrojmë historikun e atyre që kanë kontribuar për të mos i lënë në harresë.

Nga e tërë kjo, është bërë prezantimi i arkivit që është ruajtur me kujdes, dhe është digjitalizuar për jetëgjatësinë e dokumenteve që do të flasin më së miri për historinë tonë. Treguesi më i mirë është përmbledhja në libër, duke bërë ftesë për grumbullime të shënimeve që mund të jenë ende në disa shoqata që kanë vepruar nëpër kantone e që janë vonuar ti dorëzojnë në qendrën në Luzern. Anëtarët e kryesisë Xholec Deda, Agim Alaj, Saim Tahiraj, Era Deda dhe Fadil Haxhosaj nxorën një rikapitullim të këtyre ngjarjeve, duke i konsideruar se janë realizuar me sukses, ashtu sikur edhe janë planifikuar, secila në përputhje me vendimet e marra më herët. Secili bëri analizën e ecurisë së këtij promovimi, e që ishin në pajtim se është realizuar në koncepte të larta. Edhe pikat tjera të rendit të ditës morën trajtesë dhe u nxorën ide për secilën si tu qaset pikërisht mbledhjes së donacioneve dhe shqyrtimit të kërkesave që vijnë vazhdimisht në shoqatë dhe u duhet përgjigje.

Fundi i vitit si gjithnjë ka disa specifika të veta që duhet realizuar dhe se morën diskutime për dërgimin e fletëpagesave dhe kontaktit me aktivistë. Promovimi në Zvicër dhe përkthimi në gjermanisht Pas disa vendimeve që u morën dhe u biseduan, u planifikua edhe koha e promovimit të monografisë në Zvicër me parashikim në tremujorin e parë të viti që po hyjmë. Njëherë të gjithë të zëshëm morën vendim edhe për përkthimin e librin në gjuhën gjermane, duke nisur kontaktet me përkthyes të mundshëm dhe këtij projekti më të ri për shoqatën.

Rreth botimit dhe promovimit të monografisë

Me vendimin e shoqatës që nga viti 2019, kanë nisur përpjekjet për botimin e një libri për të pasqyruar të përmbledhura aktivitetet dhe donacionet për Kosovë, Shqipëri, Mali i Zi, si dhe nëpër shumë vende të botës, e që kanë realizuar dedikimin e vetë shoqatës për ekzistencën e saj. Pikërisht koha kur krijohet varfëri e skajshme në Kosovë nga regjimi që e kemi braktisur tashmë, prej viti 1990 dhe në kulmin e së keqes në kohën e luftës në vitin 1998/1999, kur është kërkuar përkushtim tejet i fuqishëm me ndihma ushqimore, medikamente, rroba dhe të tjera. Pa harruar këtu edhe pas luftën në pjesëmarrje të rindërtimit të vendit, duke qenë në hapë me të gjitha subjektet tjera. Të gjitha këto janë mbledhur nga arkivi i shoqatës e janë botuar në një libër monografik nga autori Engjëll I. Berisha. Shoqata mori dhe një tjetër iniciativë për ta promovuar pikërisht para publikut në Kosovë, në bashkëpunim me institucionet e saj e në prezencën e mediave.

Ngjarja u zhvillua në Prishtinë me datë 5 nëntor, 2022, në prani të një publiku të gjerë, duke u shfaqur edhe në televizionin shtetëror, RTK, me paraqitje të drejtpërdrejtë. Edhe me fjalime nga Ministria e Kulturës, nga Presidenca, shoqata, botuesi dhe vrojtues të shkrimeve publicistike mori vlerën e një libri serioz, voluminoz dhe me peshë historike. Pjesë e mirë e kryesisë dhe aktivistëve ishin prezent duke udhëtuar nga Zvicra. Libri u shpërnda falas, 300 copë në duar të lexuesit pjesëmarrës sa ishin prezent. Gjithashtu u shërbyen edhe me koktej rasti.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat