​Vetëvendosje dhe opozita përplasen për dialogun

Aktuale

​Vetëvendosje dhe opozita përplasen për dialogun

Më: 23 qershor 2021 Në ora: 12:48
Pamje nga vendi i ngjarjes

Pozitë dhe opozitë janë bërë bashkë sot në konferencën “Kapitull i ri i dialogut Kosovë-Serbi” të Institutit Demokratik të Kosovës (KDI). Derisa partia në pushtet vlerësoi se janë të përgatitur për këtë proces, opozitarët thanë se Qeveria Kurti është e papërgatitur për dialogun.

Nga ana tjetër, arritja e marrëveshjes finale po shihet si larg e arritshme edhe nga KDI.

Ushtruesja e detyrës së shefes së grupit parlamentar të Lëvizjes Vetëvendosje, Mimoza Kusari-Lila tha se janë të gatshëm të vazhdojnë dialogun, bazuar në parimet e vendosura, por për të njëjtin duhet të punojnë dy palët dhe jo vetëm Kosova.

Madje, ajo ngriti dyshime edhe nëse do të duhej të quhet faza finale e dialogut, pas deklaratat të djeshme të presidentit serb, Aleksandër Vuçiq se nuk do ta njeh Kosovën.

Krahas kësaj, Kusari-Lila tha se gjitha marrëveshjet e kaluara, që janë vlerësuar të dëmshme do të vinë me propozime të reja, si këshilli nacional i pakicave, alternativë e asociacionit.

Kusari-Lila: Kujdes kur themi jemi në finalen e dialogut, Vuçiq po thotë se s’e njeh Kosovën

“Dialogu Kosovë-Serbi përfshinë dy palë, Kosovën dhe Serbinë, vetëm dje e kemi dëgjuar presidentin serb në dy deklarata që janë në kundërshti me secilën normë ndërkombëtare, e cila tashmë është e konfirmuar. E para që Kosova është shtet i pavarur dhe tash bëhen 11 vjet nga vendimi i GJND-së që nuk ka pasur shkelje në shpalljen e pavarësisë së Kosovës dhe e dyta me mohimin e serishëm të gjenocidit në Bosnje. Të gjitha përpjekjet mund t’i bëjmë në Kosovë, të kemi unitet brenda krerëve institucionalë, të kemi bashkërendim të qëndrimeve edhe me partitë opozitare, por dialogu nuk mund të ketë rezultat për faktin se në anën tjetër është një udhëheqës siç është Vuçiq, pjesë e estabilishmentit të Millosheviqit dhe mundemi të takohemi prapë në formate të tilla të kërkojmë rezultat dhe i njëjti nuk mund të jetë pa qenë dy palët. Tash e kemi një ri-konfirmim të qëndrimit të Serbisë që duhet të kemi kujdes edhe kur themi se jemi në fazën finale të dialogut. A dëshirojmë finale të dialogut me një president që thotë se nuk e njoh pavarësinë e Kosovës, ku kryesorja dhe përmbajtjesorja është njohja e ndërsjellët?”, tha ajo.

Por, kritika ndaj qasjes së Qeverisë Kurti për dialogun adresoi shefi i grupit parlamentar të PDK-së, Abelard Tahiri, derisa tha se qëllimi nuk duhet të jetë vetëm tek njohja reciproke, por edhe anëtarësimi i Kosovën në OKB.

Tahiri: Kryeministri Kurti ka qasje të gabuar për dialogun

“Nuk ka një agjendë, e cila mund të diskutohej ndërmjet partive në pushtet dhe partive opozitare. E shoh një qasje të gabuar të pikënisjes së qeverisë sonë. Kur jemi te njohja, unë nuk besoj që qëllimi jonë final duhet të jetë njohja Kosovë-Serbi. Këtu është gabimi që ne e bëjmë, sepse edhe nëse ajo ndodh dhe pengesën e kemi në Këshill të Sigurimit nga Rusia dhe Kina, realisht Republika jonë nuk po arrin të përmbyllë subjektivitetin ndërkombëtar”, tha ai.

Ndërsa, deputeti i LDK-së, Driton Selmanaj tha se Qeveria Kurti po improvizon dhe po taktizon në këtë proces. Ai tha se qasja e ekzekutivit për marrëveshjen e Uashingtonit është e dëmshme për Kosovën.

Selmanaj: Ka improvizime nga Qeveria Kurti për dialogun

“Duket se ka një mos përgatitje për këtë temë, sikur ka improvizime dhe taktizime në hapa, por jo pozicion të qartë të Kosovës për këtë proces. Qasja fillestare tregon për qasjen jo serioze që ka kjo qeveri. Ne të gjitha dokumentet ia kemi dorëzuar në pranim-detyrën, përkundër që ne nuk kemi pranuar asgjë që kemi marrë”, tha Selmanaj.

Kritika për përmbajtjen e propozimeve të kryeministrit Kurti në takimin e parë me presidentin Vuçiq adresoi edhe shefi i grupit parlamentar të AAK-së, Besnik Tahiri.

Tahiri: Kryeministri Kurti nuk ka strategji për dialogun

“Kryeministri Kurti nuk ka strategji, ka taktizim, aspekti strategjik mungon, ka taktika. Në aspektin taktik ka vepruar mençur duke çuar katër pika, pasi shkoi edhe ai me propozim. Mirëpo, në dialog me fasilitues si BE nuk është taktika, por përmbajtja dhe strategjia, e cila ishte katastrofë. Kërkoi nga CEFTA të bëhet SEFTA, e që në esencë është mini-Shengen”, tha ai.

Nga ana tjetër, hulumtuesja në KDI, Violeta Haxholli u shpreh skeptike për arritjen e shpejtë të një marrëveshje finale Kosovë-Serbi.

Haxholli: Arritja e kësaj marrëveshje po duket shumë e vështirë dhe ende larg

“Që nga fillimi i procesit, Kosova dhe Serbia e kanë përcjellë ndryshe normalizimin, duket se edhe në këtë fazë Kosova dhe Serbia kanë definicione të ndryshme se si duhet të duket ajo marrëveshja përfundimtare. Prandaj edhe arritja e kësaj marrëveshje po duket shumë e vështirë dhe ende larg”, tha ajo.

Pjesë e kësaj konference për dialogun Kosovë-Serbi, ishte edhe ambasadori i Zvicrës në Prishtinë, Thomas Kelly, i cili kërkoi një rol më aktiv të Kuvendit në këtë proces.

Shfaq komentet
comments powered by Disqus
Sot mund të lexoni Shfletoni kopertinat