Fituesi i këtij edicioni futbollistik të Kategorisë Superiore U-15 do të përcaktohet mes Tiranës që do të luajë në finale kundër Internacional Tiranës.
Ditën e shtunë u zhvilluan ndeshjet e fazës gjysmëfinale të kësaj kategorie, me bardheblutë që mundën Vllazninë nga pika e bardhë e penalltive, duke u treguar më të saktë në goditjet e 11 metërshave. Ndeshja ishte mjaft e luftuar, me të dyja skuadrat që krijuan shumë raste, por pa finalizuar në portë, duke e mbyllur kështu kohën e rregullt me rrjeta të paprekura. Kryeqytetasit fituan 3-1 me penallti, duke siguruar kështu biletën për në finale.
Përballë Tiranës do të jetë ekipi i Internacional Tiranës, që mundi durrsakët e Teutës. 90 minutat e kohës së rregullt nuk mjaftuan për ekipet, që u drejtuan drejt 11 metërshave për të përcaktuar finalistin e dytë, ku djemtë e Internacionalit goditën saktë dhe triumfuan në fund. Koha e rregullt u mbyll në barazimin 1-1, me Teutën që kaloi fillimisht në avantazh me Duron në minutën e 11-të, ndërsa Bode barazoi shifrat në pjesën e dytë të lojës.
Ky është edicioni i dytë i zhvillimit të kampionatit të kësaj grupmoshe, që ashtu si vitin e kaluar, ka qenë mjaft i suksesshëm.
