Brajan Grudës i mjaftuan katër ditë për t'u kthyer nga një emër i harruar në Gjermani në një nga armët kryesore të Jürgen Kloppit. Tani e pret sfida e parë e madhe: çerekfinalja e Ligës së Kombeve kundër Belgjikës.
Shorti i hedhur sot në Nyon të Zvicrës e vendosi Gjermaninë përballë Belgjikës. Ndeshjet luhen vajtje-ardhje në fund të marsit 2027, ndërsa fituesi kalon në turneun final të qershorit.
Katër ditë që ndryshuan gjithçka
Gruda debutoi me Gjermaninë më 13 nëntor në Beograd. Në minutën e 50-të, pas një depërtimi individual, shënoi golin për 3-0 në fitoren 3-1 ndaj Serbisë. Gjatë ndeshjes kaloi me sukses kundërshtarin në nëntë nga 14 driblime, ndërsa "Sofascore" e shpalli lojtarin më të mirë të ndeshjes me notën 8.9.
Tri ditë më vonë, në Berlin, Kloppi e nxori titullar në krahun e djathtë kundër Holandës. Gruda u përgjigj me një gol dhe dy asiste. Nga goditja e tij e dënimit, Schlotterbeck shënoi me kokë golin e tretë, ndërsa pasimi i tij i hapi rrugën golit të dytë të Florian Wirtzit. Golin e pestë e shënoi vetë, pasi goditja e Derry Scherhantit u kthye nga shtylla. Gjermania fitoi 5-0 dhe e mbylli grupin në vendin e parë.
Kloppi: "Ajo që tregoi Brajani, është Brajan Gruda"
Trajneri i Gjermanisë nuk e fshehu kënaqësinë. Pas ndeshjes në Beograd ai kujtoi kohën kur Gruda luante te Mainzi, ku kishte shënuar një gol të ngjashëm. "I shkreti mbrojtësi i majtë serb", shtoi Kloppi me humor. Sipas tij, askush nuk dyshonte se Gruda di të luajë kështu. "Ajo që tregoi Brajani, është Brajan Gruda", tha ai.
Pas fitores ndaj Holandës, Kloppi ishte edhe më i entuziazmuar: "Derry Scherhant dhe Brajan Gruda, o perëndi sa mirë dinë të luajnë këta të dy!"
I harruar nga Nagelsmann
Ky shpërthim vjen pas vitesh pritjeje. Ish-trajneri Julian Nagelsmann e ftoi Grudën vetëm një herë, në qershor 2024, për ndeshjen 0-0 me Ukrainën para Europianit në Gjermani. Gruda e kaloi gjithë ndeshjen në stol. Sipas televizionit "Sky", Nagelsmannit nuk i pëlqente sjellja "e shkujdesur, ndonjëherë e paturpshme dhe naive" e sulmuesit, ndërsa stafi i tij mendonte se Gruda nuk ishte ende gati për kombëtaren.
Në mars të këtij viti, Nagelsmann tha se Gruda ka "shumë cilësi", por se golat dhe asistet e tij nuk ishin ende të mjaftueshme për nivelin e tij. Kloppi, që e mori drejtimin e Gjermanisë pas Kampionatit Botëror, i dha atë që i kishte munguar: besimin.
Djali nga Shkodra që zgjodhi Gjermaninë
Gruda u lind në Speyer të Gjermanisë, nga prindër me origjinë nga Shkodra. Prindërit e tij, Bujari dhe Manjola, e ndjekin pothuajse në çdo ndeshje. Në Shqipëri shpresuan deri në fund që ai të zgjidhte kombëtaren kuqezi. Por pas debutimit në një garë zyrtare në moshën 22-vjeçare, rruga drejt Shqipërisë është mbyllur.
Deri në çerekfinalen me Belgjikën kanë mbetur katër muaj, ndaj forma në klub do të jetë vendimtare. Gruda luan te Leipzigu me huazim nga Brightoni dhe pritet të bëhet lojtar i përhershëm i klubit gjerman në vitin 2027. Ai rikthehet nesër në Bundesligë, kur Leipzigu luan në transfertë me Union Berlinin, nga ora 15:30.