Erik ten Hag ka bërë thirrje për unitet përballë protestave të planifikuara kundër “Glazer” nga tifozët e Manchester United, duke këmbëngulur se pronarët e urryer amerikanë duan sukses për klubin. Mbështetësit e tërbuar synojnë të shprehin zemërimin e tyre me demonstrata përpara ndeshjes së të hënës me Liverpool-in.
Trajneri holandez këmbëngul se i gjithë klubi duhet të qëndrojë së bashku nëse duan të ndryshojnë fillimin katastrofik të sezonit të ri. Tifozët e Manchester United kanë shtuar thirrjet për shitjen e klubit nga familja “Glazer”, pasi humbjet radhazi i kanë zhgënjyer totalisht.
Mesazhi “#EmptyOldTrafford” është shpërndarë në mediat sociale, me mbështetësit që planifikojnë ta tregojnë zemërimin e tyre përpara takimit me rivalët më të ashpër, Liverpool. Ten Hag rrezikoi një reagim të ashpër, duke thënë:
“Mund të them vetëm se pronarët duan të fitojnë dhe tifozët ne i duam në mbështetje të klubit. Unë mund ta kuptoj ndonjëherë zemërimin, por nuk kam aq gjatë në klub për ta parë të gjithë sfondin. Ne duhet të luftojmë së bashku dhe të jemi të bashkuar”.
Ekziston besimi në rritje se “Glazer” janë të përgatitur për ta shitur klubin, me miliarderin Sir Jim Ratcliffe që konfirmon qëllimin e tij për t’i blerë aksionet. Veç fillimit katastrofik të sezonit, tifozët janë të zemëruar për mungesën e përforcimeve te Manchester United këtë verë.
Ten Hag është i vendosur ta përfundojë nënshkrimin e Casemiro nga Real Madridi, me brazilianin që e bën të qartë synimin e tij për t’u transferuar në “Old Trafford” me një marrëveshje me vlerë rreth 51 milionë £, plus bonuse.
Trajneri holandez ishte i paqartë për të ardhmen e Cristiano Ronaldos, me klubin që kuptohet se tani është i përgatitur të dëgjojë ofertat për portugezin: “Ai është në planet tona, kjo është ajo që mund të them. Nuk e di pse ai është një fokus i veçantë pas të shtunës. Ishte performanca e ekipit, qëndrimi i gjithë ekipit, duke përfshirë Ronaldon, që solli humbjen e rëndë”.
Ai e bëri të qartë se nuk do të pranojë një paraqitje të tillë kundër Liverpool: “Reagimi fillon nga vetja. Kërkoj të veprojmë si ekip, të ndiqen rregullat dhe parimet, të punojmë shumë dhe të rrisim besimin. Çdo ndeshje është e ndryshme, kërkon një qasje ndryshe, por plani do të jetë i njëjtë”.
