Ylli i Anglisë, Raheem Sterling do të kthehet tek skuadra e tij në Kupën e Botës në Katar përpara ndeshjes çerekfinale të Tre Luanëve kundër Francës të shtunën, pasi udhëtoi për në shtëpi pasi grabitësit hynë në banesën e tij.
Sulmuesi humbi fitoren e Anglisë 3-0 ndaj Senegalit të dielën pasi shtëpia e tij në Surrey, Angli, u grabit mbrëmjen e 3 dhjetorit.
“Sulmuesi i Çelsit u largua përkohësisht për t’u marrë me një çështje familjare, por tani pritet të ribashkohet me skuadrën në Al Ëakrah të premten (9 dhjetor) përpara çerekfinales me Francën”, njoftoi Federata e Futbollit të enjten.
Familjarët e futbollistit njoftuan policinë pak para orës 21:00 më 3 dhjetor për të raportuar se disa bizhuteri, përfshi orë të shtrenjta, ishin grabitur.
“Për momentin mbetet e paqartë se në cilën datë është vjedhur prona dhe vërtetimi i kësaj përbën një pjesë kyçe të hetimit tonë”, tha policia.
Më para u njoftua se kur grabitësit e armatosur hynë në banesë, brenda ishte edhe familja e futbollistit.
Por në deklaratën e saj, Policia e Surrey tha: “Ne jemi të vetëdijshëm për raportimet në media që thonë se ka pasur të dyshuar të armatosur të përfshirë, megjithatë, ne ju sigurojmë se deri më tani nuk ka pasur një dëshmi të tillë dhe s’ka raportime për ndonjë kërcënim lidhur me këtë incident.”
Incidenti ndodhi në mbrëmjen e 3 dhjetorit, dhe Sterling u tha se ishte “i tronditur dhe i shqetësuar” për mirëqenien e fëmijëve të tij pas ngjarjes.
