Ardon Jashari nuk la gjurmë në fushën e blertë në Botërorin e Katarit, por pa dyshim se ishte protagonist jashtë saj.
Sensacioni shqiptar u përfshi në listën e trajnerit Murat Yakin për pjesëmarrje në Kupën e Botës me Zvicrën.
Ai luajti pak minuta në “Katar 2022”, por ishte protagonist sidomos në lojën me Serbinë, kur Granit Xhaka e veshi fanellën e tij pas lojës për të festuar me mbiemrin Jashari, derisa shumëkush e lidhi këtë me familjen legjendare Jashari, respektivisht me krye-komandantin Adem Jashari.
E kjo zatën ka bërë që Ardon Jashari të marrë hov në rrjetet sociale.
Në fakt, futbollisti i Luzernit e sheh veten në Top 15 futbollistët që e patën rritjen më të madhe të ndjekësve në Instagram.
Në bazë të statistikave të nxjerra nga platforma “Wettbasis”, Jashari pati ngritje prej 335% të ndjekësve, krahasuar me periudhën e para Botërorit me atë të pas Botërorit.
Në këtë listë gjenden edhe yjet si Lionel Messi, Cristiano Ronaldo e Kylian Mbappe, që patën rritje të hatashme në këtë rrjet social.
Pati lojtarë që kishin rritje madje në mbi 9 mijë për qind.
Messit pas triumfit në Kupën e Botës iu shtuan 25 milionë ndjekës në Instagram, kurse Ronaldos 22 milionë.
