Përzgjedhësi i Francës, Didier Deschamps, e ka rikthyer në vëmendje një nga momentet më të dhimbshme të karrierës së tij si trajner, humbjen në finalen e Euro 2016 kundër Portugalisë.
Duke folur për finalet e humbura gjatë drejtimit të “Les Bleus”, Deschamps u ndal te ndeshja e zhvilluar në “Stade de France”, ku Portugalia triumfoi 1-0 pas golit të Ederit në vazhdime.
Sipas trajnerit francez, nëse sistemi VAR do të ishte në përdorim në atë kohë, goli vendimtar i Portugalisë mund të mos ishte pranuar.
“Me teknologjinë që përdoret sot, ai gol ndoshta do të ishte anuluar”, ka deklaruar Deschamps, duke iu referuar një dueli të diskutueshëm që e parapriu aksionin e golit vendimtar.
Finalja e Euro 2016 mbetet një nga zhgënjimet më të mëdha për Francën, e cila e zhvilloi turneun në shtëpi dhe ishte konsideruar favorite për ta fituar trofeun.
Megjithatë, pas 109 minutash lojë, Eder e shënoi golin e vetëm të ndeshjes dhe ia siguroi Portugalisë titullin e parë evropian në histori.
Deschamps e pranoi se humbja ndaj Portugalisë dhe ajo në finalen e Kupës së Botës 2022 kundër Argjentinës mbeten plagë të hapura, por theksoi se ato e kanë ndihmuar ekipin të rritet dhe të mësojë nga gabimet.
Pavarësisht zhgënjimit të Euro 2016, Franca arriti të rikthehej fuqishëm dy vite më vonë, duke e fituar Kupën e Botës në Rusi dhe duke ia dhënë Deschampsit trofeun më të rëndësishëm të futbollit botëror si trajner.
