Pas dhjetë vitesh përgatitjesh, më në fund ka ardhur momenti – Kampionati Botëror 2026, Botërori më i madh në histori, nis sot në Mexico City.
Me 48 kombëtare, 104 ndeshje, 16 qytete mikpritëse dhe organizim në tri shtete – United States, Canada dhe Mexico – bota do të përjetojë më shumë se pesë javë ethe futbollistike.
Presidenti i FIFA, Gianni Infantino, e ka quajtur këtë turne “ngjarjen më të madhe që njerëzimi ka parë ndonjëherë”.
Miliona tifozë dhe miliarda të ardhura
FIFA pret që mbi pesë milionë tifozë të ndjekin ndeshjet në stadiume, ndërsa të ardhurat pritet të arrijnë rreth 3 miliardë dollarë, katër herë më shumë sesa në Botërorin e 2022 në Katar.
Sipas FIFA-s, rreth gjashtë miliardë njerëz, pothuajse tri të katërtat e popullsisë së botës, do ta ndjekin turneun në forma të ndryshme. Vëmendje e veçantë do të jetë te paraqitjet e fundit të Lionel Messi dhe Cristiano Ronaldo në skenën më të madhe të futbollit, por edhe te yjet e rinj si Lamine Yamal dhe Desire Doue.
Pse futbolli është kaq i dashur?
Sipas analizës së The Athletic, fuqia e futbollit qëndron te universaliteti i tij. Është një sport i thjeshtë dhe i qasshëm, që luhet kudo – në rrugë, plazhe, lagje dhe fusha të improvizuara – nga njerëz të çdo moshe dhe shtrese shoqërore.
Edhe pse futbolli nuk ka shumë gola krahasuar me sporte të tjera, rëndësia e çdo momenti e bën atë unik. Në Botërorin e vitit 2022 kishte mesatarisht 2.69 gola për ndeshje, por emocionet mbetën të jashtëzakonshme.
Politika dhe polemikat
Botërori, megjithatë, nuk është pa polemika. Infantino është kritikuar për marrëdhëniet me liderë politikë si Vladimir Putin dhe Donald Trump, ndërsa Botërori i Katarit u shoqërua me kritika për të drejtat e njeriut dhe kushtet e punëtorëve migrantë.
Në prag të këtij Botërori, polemika të reja kanë lindur pas raportimeve për kufizime hyrjeje në SHBA për disa tifozë dhe figura sportive nga vende të caktuara.
Bukuria që mbetet pavarësisht gjithçkaje
Megjithatë, pavarësisht problemeve politike dhe komerciale, futbolli vazhdon të ofrojë momente magjike. Botërori i vitit 2018 solli befasi si fitoret e Koresë së Jugut dhe Meksikës ndaj Gjermanisë, ndërsa finalja e vitit 2022 mes Argjentinës dhe Francës konsiderohet një nga më të mëdhatë në histori.
Në fund, siç shkruan The Athletic, bukuria e futbollit mbetet e paprekur: kur topi nis të rrotullohet dhe vjen goli i parë, bota ndalet për një çast dhe gjithçka tjetër kalon në plan të dytë.
