Shkëndija e Haraçinës me padurim e pret edicionin e ri që të debutojë me sukses në elitën e futbollit të Maqedonisë së Veriut.
Parësore për skuadrën shqiptare është të ruajë skeletin e futbollistëve po ashtu edhe të përforcohet që të jetë sa më e kompletuar për edicionin e ri.
Antoni Stoleski, portieri më i merituar që Shkëndija është në elitën e futbollit, ka vazhduar kontratën me klubin.
“Klubi Futbollistik Shkëndija 77 ka kënaqësinë të njoftojë se ka arritur marrëveshje për vazhdimin e bashkëpunimit edhe për një vit me portierin tonë titullar, Antoni Stoleski.
Stoleski, i cili mbrojti me mjaft sukses ngjyrat tona duke qenë një siguri e madhe midis shtyllave në rrugëtimin e suksesshëm drejt Ligës së Parë, do të vazhdojë të mbajë veshur fanellën kuqezi edhe për sezonin e ri.
Përvoja, profesionalizmi dhe dedikimi i tij brenda dhe jashtë fushe janë një garanci e madhe për sfidat e reja që na presin në elitën e futbollit vendor.
Na priftë e mbara dhe shumë suksese të reja së bashku, Antoni!”, thuhet në njoftimin e klubit.
