​Testet zbulojnë gjendjen e Valverdes

Futboll

​Testet zbulojnë gjendjen e Valverdes

Më: 27 tetor 2026 Në ora: 14:58
Valverde

Testet fillestare mjekësore kanë përjashtuar mundësinë e një dëmtimi serioz të mesfushorit të Real Madridit, Fede Valverde, i cili përjetoi dhimbje në kofshën e pasme gjatë përballjes ndaj Barcelonës në El Clasico.

Sipas gazetës britanike “The Athletic”, ekzaminimet e para të kryera në qendrën stërvitore të klubit në Valdebebas nuk kanë zbuluar ndonjë dëmtim serioz, duke sjellë lajme pozitive për skuadrën madrilene.

Reprezentuesi uruguaian vazhdoi të luante për rreth 40 minuta pavarësisht dhimbjeve, përpara se të zëvendësohej nga Denzel Dumfries. Trajneri Jose Mourinho do ta monitorojë gjendjen e tij gjatë ditëve në vijim, ndërsa nuk përjashtohet mundësia që ta pushojë në ndeshjen e radhës ndaj Racing Santander, nëse nuk rikuperohet plotësisht.

Valverde është shndërruar në një lojtar të rëndësishëm në skemat e Mourinhos, veçanërisht pas aktivizimit të tij në pozitën e mbrojtësit të djathtë. Kjo zgjidhje taktike i ka mundësuar trajnerit portugez të ruajë ekuilibrin në mesfushë dhe t’i japë më shumë hapësirë Arda Gulerit.

Përveç kontributit teknik, energjia, kapaciteti fizik dhe vrapimet e vazhdueshme të uruguaianit në krahun e djathtë i kanë dhënë skuadrës një ekuilibër të rëndësishëm.

Në rast se Valverde nuk do të jetë i gatshëm për duelin e ardhshëm, Dumfries shihet si alternativa më e mundshme për ta zëvendësuar. Megjithatë, një ndryshim i tillë mund ta detyrojë Mourinhon të rishikojë skemën që ka funksionuar mirë gjatë javëve të fundit.

Real Madridi nuk dëshiron të rrezikojë me gjendjen fizike të njërit prej lojtarëve më të rëndësishëm të skuadrës, sidomos duke pasur parasysh sfidat e ardhshme në La Liga dhe Ligën e Kampionëve.

Vendimi përfundimtar për aktivizimin e Valverdes do të merret në bazë të reagimit të tij gjatë stërvitjeve të kësaj jave. Objektivi i klubit është që ta menaxhojë me kujdes rikuperimin e tij, në mënyrë që shqetësimi fizik të mos shndërrohet në një dëmtim më serioz.

Sot mund të lexoni Shfletoni kopertinat