Referendumi i Serbisë në Kosovë, serbët e Graçanicës flasin për kryeministrin Albin Kurti

Lajme

Referendumi i Serbisë në Kosovë, serbët e Graçanicës flasin për kryeministrin Albin Kurti

Më: 14 janar 2022 Në ora: 18:40
Albin Kurti

Të dielën e 16 janarit qytetarët e Serbisë do të votojnë në referendumin për ndryshimin e Kushtetutës së Serbisë.

Ndërkohë, që serbët që banojnë në Kosovë kanë deklaruar se një gjë të tillë do ta shfrytëzojnë vetëm nëse i lejon Qeveria e Kosovës.

“Më besoni, nuk e di. Nëse (Albin) Kurti na lejon, sigurisht që po. Sigurisht do të votoj sepse është në pyetje diçka në të mirë të të gjithë neve”, ka thënë një nga banorët e Graçanicës.

Radovani nga Kuzmini ka thënë se nuk e di se si do të mundësohet votimi. “Nuk e di, po thonë se s’ka shans të votimit”.

Gradimir Lazhiq po ashtu po i ndjek ngjarjet e fundit. Ai ka thënë se fjalën e fundit do ta japë Qeveria e Kosovës.

“Nëse do të lejohet, është pikëpyetje. Qeveria e Kosovës ka të drejtat e veta, ajo vendos për shtetësinë e vet, edhe pse s’ka shtet. Nuk mund të bëjmë diçka për këtë. Si të vendosin ata, ne do të votojmë po që se është e mundur”, ka thënë ai.

Gjatë ditës së sotme partnerët ndërkombëtarë kanë bërë presion ndaj institucioneve të Kosovës që të lejojnë organizimin e këtij referendumi. Megjithatë, krerët e Kosovës nëpërmjet një deklarate të përbashkët kanë dalë kundër e për këtë kanë marrë mbështetjen edhe të opozitës.

Kurse, Qeveria e Kosovës ka konfirmuar se me ftesë të kryeministrit Albin Kurti, të shtunën e 15 janarit do të mbahet seancë e jashtëzakonshme parlamentare.

Në një njoftim të ZKM-së bëhet e ditur se në rend dite është diskutimi për këtë çështje e në fund nxjerrja e një rezolute të përbashkët.

“Në rend të ditës së kësaj seance të jashtëzakonshme është diskutimi në lidhje me synimin e Serbisë për të mbajtur referendum kushtetues në territorin e Republikës së Kosovës. Diskutimi nga kjo seancë ka për qëllim të nxjerrë një rezolutë të përbashkët, në të cilën shprehet vullneti politik i deputetëve dhe grupeve parlamentare dhe Kuvendit të Republikës së Kosovës, mbi çështjen e lartshënuar”, thuhet në njoftim.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat