OBRM-PDUKM: Protestuesit dje i thanë jo propozimit francez

Maqedonia

OBRM-PDUKM: Protestuesit dje i thanë jo propozimit francez

Më: 3 korrik 2022 Në ora: 13:02
Foto ilustrim

Partia opozitare OBRM-PDUKM përmes një komunikate ka thënë se nga protesta e mbrëmshme, populli protestues i tha “jo” propozimit francez.

“Qytetarët dje në masë të qartë dhe me zë të lartë thanë “JO FALEMINDERIT” ultimatumeve dhe diktateve që përmban propozimi që Qeveria e Kovaçevskit dhe Osmanit e kanë pranuar. Qytetarët kundërshtojnë legalizimin e asimilimit të popullit maqedonas, poshtërimeve dhe deformimeve të identitetit që është e gatshme t’i bëjë kjo Qeveri. Edhe populli edhe opinioni ekspert janë të bindur se Qeveria gënjen.

Kjo kontratë është e njëjta që Kovaçevski dyshohet se e kishte refuzuar një javë më parë. Me këtë Propozim dhe dokumentin përcjellës, gjuha maqedonase cilësohet si dialekt bullgar perëndimor. Propozimi kornizë, pjesë integrale e të cilit janë raportet vjetore, mbulon çështjet historike, e me këtë edhe kërkesat negative të Sofjes. Nëse Qeveria e pranon propozimin, atëherë Maqedonia në mënyrë arbitrare pranon negociatat e përjetshme ose asimilimin e plotë të brezave të sotëm, të kaluar dhe të ardhshëm”, thuhet në komunikatën e partisë.

Nga OBRM-PDUKM thonë se “kjo qeveri ka humbur besueshmërinë dhe legjitimitetin, prandaj tani me mashtrime dhe kërcenime po mundohen të mbajnë pushtetin në duart e tyre”.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat