OBRM-PDUKM edhe sonte proteston, Spasovski pret që të përdoren edhe koktej molotovi

Maqedonia

OBRM-PDUKM edhe sonte proteston, Spasovski pret që të përdoren edhe koktej molotovi

Më: 6 korrik 2022 Në ora: 17:48
Foto ilustrim

Dhunë, shtyrje, sharje e vandalizëm nëpër rrugët e Shkupit.

E gjithë kjo si revoltë kundër propozimit francez.

Protestuesit sulmuan shtëpinë ligjvënëse.

Të maskuar arritën të kalojnë gardhin mbrojtës dhe sulmuan i policët me gurët e betonit që i nxirrnin nga rruga.

Përveç sulmeve te drejtpërdrejta ndaj policisë, protestuesit dhunuan edhe disa institucione, duke thyer e dëmtuar ndërtesën e Kuvendit dhe Ministrisë së Jashtme.

U lënduan 47 policë, ndërsa 11 protestues u arrestuan, 2 prej të cilëve adoleshentë.

Ministri i Brendshëm Oliver Spasovski bashkë me zëvendësin e tij Nazim Bushi në mëngjes vizituan policët e lënduar.

Spasovski tha se ngjarja e mbrëmshme i ngjante 27 prillit.

“Formë e tillë e dhunës së organizuar, është rast që na e kujton 27 prillin.

30 njerëz të maskuar me kapele në kokë shkaktuan gjithë këtë prishje të rendit, sulm ndaj institucioneve dhe sulm ndaj policëve”, tha Oliver Spasovski, ministër i Brendshëm.

Kryetar i Kuvendit Talat Xhaferi në Facebook publikoi dëmet e shkaktuara brenda hapësirave të Kuvendit, duke dënuar ashpër dhunën e mbrëmshme ndaj tempullit të demokracisë.

“Pasojat nga tërbimi i djeshëm para Kuvendit. E njoh dhe mbështesë të drejtën e çdokujt për protestë, për shprehjen e qëndrimit. Vazhdimisht dhe fuqishëm e dënoj huliganizmin, dhunën, nxitjen e urrejtjes, sepse ato nuk janë zgjidhje”, pohoi Talat Xhaferi, kryetar i Kuvendit.

E për shkak të situatës së tensionuar, Presidenti Stevo Pendarovski, mbrëmë anuloi edhe një intervistë televizive.

“Intervistën në TV21 e anuluam për shkak se përreth televizionit që gjendet në afërsi të Kuvendit ishte vendosur një regjim i posaçëm i qarkullimit”, tha Stevo Pendarovski, president.

Ministri i Brendshëm Spasovski tha se ka informacione që edhe sonte do të ketë protesta të dhunshme.

“Një pjesë e grupit që duan të demonstrojnë, përgatisin edhe koktej molotovi, që do të kishin për qëllim dëmtimin e objekteve vitale. Dua edhe një herë të apeloj që të heqin dorë nga ideja e tillë. Nuk do të lejojmë në asnjë rast që të cenohet jetë, ose ndonjë objekt vital”, theksoi Oliver Spasovski, ministër i Brendshëm.

Nga OBRM-PDUKM thonë se dhuna e mbrëmshme ishte e inskenuar nga pushteti.

Shtojnë se pas njerëzve të maskuar qëndrojnë Spasovski dhe Zeçeviq.

“Dhuna para Kuvendit është vepër e instalimeve policore të LSDM-së dhe Oliver Spasovskit. Kjo nuk është vepër e popullit e as e OBRM-PDUKM-së, por e instalimeve policore të pushtetit të cilët me shkaktimin e incidenteve dhe eskalim të situatës duan që në mënyrë të shpejtë t’i kalojë tradhtia”, tha Dragan Kovaçki, deputet i OBRM-PDUKM-së

Nga OBRM-PDUKM përsëri bëjnë thirrje për protesta para Qeverisë, për të vazhduar më pas te Ministria e Jashtme dhe në fund para Kuvendit.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat