Ademi: RMV nuk dëmtohet nga ndryshimet kushtetuese

Maqedonia

Ademi: RMV nuk dëmtohet nga ndryshimet kushtetuese

Më: 1 dhjetor 2022 Në ora: 15:42
Arbër Ademi

Kryetari i Komisionit Parlamentar për Çështje Evropiane, Arbër Ademi, në fjalimin e tij në seancën e pestë plenare të Konventës Nacionale për Bashkimin Evropian në Maqedoninë e Veriut (KNBE-MK) theksoi se vendi nuk do të pësojë asnjë dëm nëse përmbushim kushtin për të ndryshuar Kushtetutën dhe për të filluar negociatat me BE-në.

Ademi tha se jemi para një sfide të madhe që ka të bëjë me ndryshimet kushtetuese dhe parakusht për hapjen e klasterave. Personalisht, por ky është edhe qëndrimi i BDI-së, tha Ademi, “Republika e Maqedonisë së Veriut nuk do të pësojë asnjë dëm nëse e përmbushim këtë kusht dhe në kushtetutën sonë përfshihen edhe bashkësitë tjera etnike, përfshirë atë bullgare”.

Sipas tij, këtë duhet ta bëjmë sa më shpejt që të jetë e mundur, nëse realisht e duam, dhe jo vetëm deklarativisht të ndjekim rrugën evropiane.

“Unë jam mbështetës i sigurimit të një konsensusi të gjerë shoqëror shtetëror ndërpartiak. Unë besoj dhe jam thellësisht i bindur se nuk kemi të drejtë të heqim dorë nga synimet strategjike të vendosura, të cilat janë brezash dhe nuk janë funksion i politikës ditore. Unë e mbështes plotësisht Qeverinë dhe përpjekjet e institucioneve tona për të hyrë në BE në vitin 2030. Të merremi më pak me politikë dhe të fokusohemi më shumë në reforma”, tha Ademi.

Ademi foli në hapjen e seancës së pestë plenare të Konventës Nacionale për Bashkimin Evropian në Maqedoninë e Veriut (KNBE-MK), e cila mbahet në Kuvend. Në seancën plenare, panelet diskutojnë temat “Themelet e integrimit evropian: Sundimi i ligjit dhe reformat e zbatuara” dhe “Si të përballemi me ndryshimet klimatike dhe pasojat sociale në bujqësi, pylltari dhe mjedisin jetësor”. Para tyre fjalim mbajti presidenti Stevo Pendarovski, e më pas ambasadorët e BE-së dhe Sllovakisë dhe zv. ambasadori i SHBA-së.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat