Rreth arrestimit të ish-kreut të Partisë Demokratike të Kosovës, Kadri Veseli, nga Gjykata Speciale, tashmë janë zbuluar disa detaje të reja.
Bëhet fjalë se dy javë para se të arrestohej dhe të dërgohej në Hagë për gjykim nga Gjykata Speciale, ish-kryetari i Partisë Demokratike të Kosovës, Kadri Veseli, kishte pranuar se do të dorëzohej vullnetarisht dhe ndaj tij s’duhej të ketë urdhërarrest po që se i konfirmohet aktakuza.
Sipas një dokumenti të fundit të publikuar nga Specialja lidhur me kërkesat për urdhërarreste dhe urdhra për transfere, avokati mbrojtës i Veselit, Ben Emmerson, kishte kërkuar nga Prokuroria që nëse konfirmohet aktakuza ndaj Veselit, të mos lëshohet fare urdhërarresti pasi klienti i tij do të udhëtonte vullnetarisht drejt Hagës për t’u dorëzuar.
Letra e Emmersonit u dorëzua më datë 21 tetor, pesë ditë para se të konfirmohej aktakuza dhe dy javë para se Veseli dhe të tjerë të dërgoheshin drejt Hagës.
Analisti politik, Faton Mehmeti, në një prononcim dhënë gazetës “Bota sot”, ka thënë se ish-kreu i PDK-së dhe i shefi i SHIK-ut, ka qenë i vetëdijshëm se do të arrestohet nga Specialja.
Ai madje konsideron se Veseli ishte më i mençur se Thaçi, pasi ky i fundit ishte kategorikisht kundër me deklarata se do të arrestohej nga Gjykata Speciale.
“Faktikisht, që nga themeli i Gjykatës Speciale ka qenë e ditur se do të arrestohen të gjithë ish-krerët e lartë të luftës, si dhe të SHIK-ut, dhe besoj e për këtë ka qenë mjaftueshëm i vetëdijshëm edhe Kadri Veseli. Ky i fundit, duket të jetë më i zgjuar se Thaçi, i cili mendonte se s’do të arrestohet ai, por vetëm shokët e tij”, ka thënë Mehmeti.
Njohësi i çështjeve politike mendon se Veseli me vetdorëzim, kishte për qëllim që kjo t’i shërbejë si masë lehtësuese në gjykimin, në rast se kërkohet të mbrohet në liri.
Mirëpo, ai akuzon SHIK-un, se ka bërë shumë mëkate, për të cilat, ai mendon se do të jetë shumë vështirë që Kadri Veseli t’i arsyetojë.
“Duke qenë se Veseli e ka ditur se do të arrestohet, sigurisht me këshillën edhe të avokati të tij ka kërkuar të dorëzohet, që do i shërbente si masë lehtësuese në gjykimin, në rast se kërkohet të mbrohet në liri. Megjithatë, SHIK-u ka bërë shumë mëkate, të cilat do të jetë shumë vështirë që Kadri Veseli t’i arsyetojë, për më tepër do të jetë akoma më vështirë të del i pastër nga gjithë kjo situatë”, deklaron ai.
Krejt në fund, ai ka theksuar se përgjegjësia e tij e madhe në Shërbimin Informativ të Kosovës, bëjnë që të mos jetë një gjykim jo i lehtë për të, madje, ai parashikon edhe dënim të madh për ish-kreun e PDK-së.
“Kjo nënkupton, se Kadri Veseli e di çfarë ka bërë SHIK-ut, dhe e di se çfarë dënimi mund ta pres. SHIK-u minimumi i vrasjeve të pasluftës ka pasur informacione, edhe nëse s’ka bërë asnjë krim, e që janë të mjaftueshme për t’u dënuar z.Veseli për mbulimin e të vërtetës, shto këto pastaj mundësinë e madhe që vet SHIK-ut të jetë organizator i vrasjeve, dënim të madh e pret Kadri Veselin”, tha krejt në fund, analisti politik.
