“Veprim i domosdoshëm për ta ndërprerë lojën e Vuçiçit”, Lepaja përgëzon Kurtin për vendimin

Politika

“Veprim i domosdoshëm për ta ndërprerë lojën e Vuçiçit”, Lepaja përgëzon Kurtin për vendimin

Nga: A.Z Më: 29 prill 2021 Në ora: 14:00
Albin Kurti

Kryeministri i vendit, Albin Kurti ka thënë se nuk do të marrë pjesë në takimin me Serbinë më 11 maj.

Ky takim ishte paralajmëruar nga Josep Borrell, përfaqësues i BE-së për dialogun Kosovë-Serbi.

“Unë nuk marr pjesë në atë takim për të cilin nuk e kam konfirmuar paraprakisht pjesëmarrjen. Ajo çka mund të konfirmoj është se do të vi në Bruksel për ndonjë drekë ose darkë punë të konfirmuar nga Borrell ku bëjnë pjesë liderët e Ballkanit Perëndimor. Vizita që e kemi këtu dy ditë është në kuadër të marrëdhënieve tona bilaterale, që na nevojiten edhe më shumë marrëdhëniet e tilla të forcuara dhe takimet e tilla të rajonit para se të fillojmë kapitullin e ri të dialogut që duhet të jetë i përgatitur mirë edhe me parime pasi nuk e kemi komoditetin për dështime të reja”, ka thënë ai.

Image
Fadil Lepaja

Lidhur me këtë në një prononcim për “Bota sot”, analisti Fadil Lepaja, e quan veprim të drejtë, sepse sipas tij, Kosova nuk duhet të jetë aty ku Serbia dikton drejtimin e dialogut.

“Veprim i arsyeshëm, i dinjitetshëm dhe i domosdoshëm për të ndërprerë lojën e Vuçiçit me çështjen e Kosovës dhe trajtimin e saj si çështje të Serbisë. Për dialog duhen dy palë dhe Kosova nuk ka pse shkon në një dialog ku Serbia i dikton rregullat apo limitet dhe drejtimin e dialogut”, ka thënë ai.

Tutje, ai ka shtuar se të gjithë duhet ta kuptojnë se politikanët e ri të Kosovës nuk mund të shantazhohen, prandaj këtë refuzim Lepaja e konsideron me vetëbesim dhe vullnet mirë.

“Jo vetëm Serbia por edhe BE-ja duhet të kuptojë se politika dhe politikanët e rinj të Kosovës nuk mund të shantazhohen më dhe se duhet të heqin dorë nga çfardo ambicie për rikthim apo diktim në punët e brendshme të Kosovës. Refuzimi i zotit Kurti nuk ka qenë kapricë as mendjemadhësi e tij, por vetëm një veprim i duhur dhe e përgëzoj për qetësinë, vetëbesimin dhe vullnetin e mirë që të bisedojë për fqinjësi të mirë me Serbinë”, ka deklaruar Fadil Lepaja për “Bota sot”.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat