Idriz Zeqiraj ia numëron ’fajet’ e Albin Kurtit: "Shko Hashim në Hagë", por a e ndërroi mendjen më pas Kurti?!

Politika

Idriz Zeqiraj ia numëron ’fajet’ e Albin Kurtit: "Shko Hashim në Hagë", por a e ndërroi mendjen më pas Kurti?!

Nga: H.O. Më: 12 gusht 2022 Në ora: 20:04
Arkiv

Sa i përket qeverisjes së Albin Kurtit për këtë kohë sa është në pushtet ka folur për ‘Bota sot’ publicisti dhe njohësi i ҫështjeve politike, Idriz Zeqiraj. Ai thotë se ka besuar shumë në guximin e Albin Kurtit, mirëpo është zgjënjyer për disa arsye.

“Kam besuar shumë në guximin qytetar të Albinit, me djemtë e vajzat aktiviste të Vetëvendosjes. Por, pjesërisht, po zhgënjehem:

Faji i parë: Këshilltari i Kurtit, Shkëlzen Gashi, tha një të vërtetë, se "edhe UÇK-ja ka vrarë një mijë serbë". Dhe, kjo është e vërtetë. Ish-ambasadori shqip-folës në Kosovë, ka deklaruar se "UÇK-ja vrau gjyshërit e bashkëshortës time, për t`ua marrë banesën"! Për këto motive të ulëta kanë ndodhur edhe ato vrasje, që përmend ish-këshilltari i Kurtit. Kriminelët reaguan dhe Kurti u dorëzua, duke shkarkuar, padrejtësisht, këshilltarin Gashi.

Faji i dytë: Albin Kurti kishte vënë pikën mbi "i", kur kishte shkruar letrën profetike dhe proverbiale "Shko Hashim në Hagë"! Ai, tashmë, ishte këndellur dhe kishte hequr dorë nga broçkulla, se "kriminelët i dënojmë ne, këtu, në Kosovë!" Aq më shumë po bindet tani, kur opozita, rrast e inkrimimnuar, po e bllokon Vettingun në sistemin e drejtësisë; në zgjedhjen e Prokurorit të shtetit; si dhe organet tjera gjegjëse, sa të dështuara, aq edhe të korruptuara”, thotë Zeqiraj.

Zeqiraj thotë më tutje se, këndellja e Kurtit se komandantët kriminelë e korruptivë, nuk ka forcë t`i dënojë asnjë gjykatë vendore, i gëzoi shqiptarët dhe të gjitha shpresat i varën tek drejtësia ndërkombëtare. Mbi 85 % e shqiptarëve, aprovuan arrestimin e shtetarëve të Kosovës, me dëshirën e shumëfishimit të këtij numri, në raport me krimet numerike, të ndodhura në Kosovë dhe Shqipëri, kryesisht, për motive politike.

Image
Idriz Zeqiraj

“Sa i befasishëm, aq edhe zhgënjyes, është veprimi i papritur i kryeministrit Kurti, kur shprehë pendesë, për sugjërimin e tij "Shko Hashim në Hagë" dhe kërkon rehabilitimin e të arrestuarëve, me justifikimin se "kanë bërë luftë të fortë", ndërkohë që, nga të katër të akuzuarit, tre syrësh nuk ishin fare pjesë e luftës. Lajthitjet e shefit të Qeverisë, i përsëritën, hipokrizisht, edhe ndoca nga vartësit e tij.  Dhe, premtimi i madh i Kurtit, për luftimin  kundër krimit të organizuar dhe hajnisë zyrtare, u relativizua. Tashmë, kriminelët dhe hajnat janë trimëruar. Andaj, janë shtuar edhe hajnitë me grabitje të bankave; vjedhjeve me thyerje të dyerëve të shtëpive private të qytetarëve. Partitë-banda të PAN-it, me kriminelë e hajna potencialë, u gëzuan shumë”, vlerëson Zeqiraj.

Ai thotë më tutje se ‘LDK-ja është e dyzuar. Klani vajton aleancën me PDK-në. Lidershipi i ri i LDK-së, edhe pse simpatik, flirtet me kryeministrin shqiptar, Edvin Rama, kanë hutuar anëtarësinë e LDK-së’.

“ Sepse ai ka shkatërruar opozitën shqiptare, duke kthyer monizmin drejtues; ka përçarë skajshëm shqiptarët; ka krijuar lidhje konspirative me Serbinë; me "Ballkanin e Hapur", po e amniston dhe rehabiliton Serbinë armike, ende pa kërkuar falje, për krimet makabre, të kryera kundër popullit tonë, duke ia dhënë asaj primatin ekonomik dhe politik në Ballkanin Perëndimor! Deklarimi i "Listës Serbe" se "qëllim të vetëm kemi rrëzimin e Qeverisë Kurti", është në unison me opozitën e Kosovës. Thirrja dëshpëruese e ish-emisarit Grenell: "Ktheni Hashimin në Kosovë", flet mjaftueshëm edhe për dëshirën e Serbisë, për të vazhduar pazaret e pista me "komandantët çlirimtarë", thekson ai.

Publicisti Zeqiraj thotë se megjithë deklaratat e thekshme, të "Listës Serbe", për rrëzimin e Qeverisë Kurti, nuk arrijnë ta sfidojnë Qeverinë e Reciprocitetit; Qeverinë që ka nisma të studjuara e logjike, për shtetin ligjor, zhvillimor dhe social.

“Teorikisht, është i mundshëm edhe rrëzimi i Qeverisë Kurti, me opozitën e bashkuar të Kosovës; "Listën Serbe", Vuçiqët, Grenellët, Humollët dhe ndoca deputetë të mundshëm, mercënarë të blerë. Por, një gjë është e sigurtë, se edhe sot sikur të bëhen zgjedhjet e reja, LVV, sërishmi, do të jetë parti e parë në Kosovë”, vlerëson Idriz Zeqiraj për ‘Bota sot’.

Image
Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat