Partizani dhe Tirana janë dy ekipet finaliste të Kupës së Federatës në volejboll për femra.
Një derbi kryeqytetas që pritet me mjaft interes.
Këto dy skuadra u kualifikuan pas përfundimit të takimeve gjysmëfinale luajtur sot pasdite në sallën e lojërave në Farkë.
Në gjysmëfinalen e parë, Partizani fitoi 3-1 ndaj Skënderbeut kampion (25-13, 25-18, 15-25, 25-18). Një ndeshje e dominuar nga të kuqtë, që patën epërsi në shumicën e kohës. Skënderbeu reagioi vetëm në setin e tretë, duke rihapur përkohësisht ndeshjen, por pa mundur të përmbysë dot shifrat.
Në sfidën e dytë, Tirana mposhti 3-0 (25-18, 25-11, 25-12) Barleti Volley në një derbi të komanduar vazhdimisht nga volejbollistet bardheblu. Skuadra barletase nuk pati shumë mundësi të rivalizojë, duke u dorëzuar shpejt, ndërsa Tirana ishte ndjeshëm superiore në parket, duke e merituar fitoren.
