Fer Volley i Edon Ibrahimit, një fitore larg titullit

Volejboll

Fer Volley i Edon Ibrahimit, një fitore larg titullit

Më: 27 prill 2025 Në ora: 22:10
Fer Volley

Fer Volley ka bërë një hap të madh drejt titullit kampion në Raiffeisen Superligën A (Femrat), pasi triumfoi me rezultat 1:3 (25:21, 18:25, 23:25, 23:25) ndaj Skenderajt edhe në ndeshjen e dytë të finales kundër Skënderajt.

Seti i parë nisi më mirë për vendaset e Skënderajt, që shfrytëzuan entuziazmin dhe gabimet e vogla të Fer Volley për të fituar 25:21 dhe për të marrë avantazhin e hershëm.

Në setin e dytë, Ferizajaset reaguan fuqishëm. Me një lojë shumë të disiplinuar në mbrojtje dhe sulme të shpejta, ato dominuan ritmin e lojës dhe fituan bindshëm me 25:18, duke barazuar gjithçka.

Seti i tretë ishte një duel shumë i ngushtë, ku të dyja skuadrat shkëmbyen pikë për pikë deri në fund. Megjithatë, Fer Volley u tregua më e qetë në momentet vendimtare dhe fitoi 25:23.

Në setin e katërt, përsëri u pa një betejë e fortë dhe dramatike, por përvoja dhe cilësia e Fer Volley bëri diferencën, duke triumfuar sërish 25:23 dhe duke fituar ndeshjen 3:1.

Tashmë, Fer Volley i trajnerit Edon Ibrahimit është vetëm një fitore larg shpalljes kampion i Kosovës.

Në mesjavë, në ndeshjen e tretë që do të zhvillohet në palestrën “Bill Klinton” në Ferizaj, Fer Volley do të ketë mundësinë të mbyllë serinë dhe të festojë titullin para adhuruesve të vet.

comment Për komente lëvizni më poshtë
Sot mund të lexoni Shfletoni kopertinat