Një tjetër sukses i madh për volejbollin gjakovar! Vashat e KV Vëllaznimi janë shpallur kampione të Kosovës në konkurrencën U18, duke e mposhtur në finale skuadrën e Suti Sport me rezultat 2:1 në sete (18:25, 25:18, 15:10).
Pas një fillimi më të ngadaltë në setin e parë, vajzat e Vëllaznimit treguan karakter të fortë dhe u rikthyen fuqishëm për ta fituar ndeshjen dhe për t’u ngjitur në majën e volejbollit për këtë grupmoshë.
Në gjysmëfinalet e zhvilluara po të njëjtën ditë, Vëllaznimi kishte eliminuar Gjinocin, ndërsa Suti Sport kishte kaluar Ferizajn pas një ndeshjeje me tri sete.
Ky është titulli i dytë brenda pak ditësh për moshat e reja të klubit gjakovar, pas suksesit edhe në kategorinë U16 — dëshmi e punës së strukturuar dhe përkushtimit të KV Vëllaznimi për rritjen e talenteve të reja.
Medaljet për të dy ekipet finaliste u ndanë nga anëtari i Bordit të FVK-së Merkur Zhubi, i shoqëruar nga gjyqtari me thirrje ndërkombëtare Burim Zymeri.
Trofeun e kampionit për ekipin fitues e dorëzoi komesari i garave në FVK, Ardian Ibraj.