Nayara Ferreira lë Dinamon pas akuzave për gjininë e saj

Volejboll

Nayara Ferreira lë Dinamon pas akuzave për gjininë e saj

Më: 19 nëntor 2025 Në ora: 14:34
Ferreira

Volejbollistja braziliane Nayara Ferreira, që luan me Dinamon në Superligën shqiptare, aktualisht është larguar nga Shqipëria dhe nuk dihet nëse do të rikthehet më. E akuzuar nga disa klube për gjininë e saj dhe e pezulluar pa afat nga Federata Shqiptare e Volejbollit, ajo ka disa ditë që nuk ndodhet në vendin tonë.

Ai që konfirmoi largimin e Ferreira është menaxheri i skuadrës së Dinamos, Andi Bareti, në një intervistë për “Panorama Sport”.

Ai theksoi: “Dinamo ka humbur një nga lojtaret më të rëndësishme të këtij sezoni dhe po vijojmë garën pa lojtaren kryesore. Kjo gjë e ka tronditur jo pak ekipin, por sigurisht më shumë vetë lojtaren braziliane”.

“Volejbollistja për momentin nuk ndodhet në Shqipëri, pasi ka kërkuar leje nga klubi.

Sigurisht që është shumë e tronditur dhe klubit i ka bërë me dije që dëshiron ta ndjekë këtë çështje deri në fund, duke kërkuar mbrojtje ligjore me anë të avokatëve të saj”, shtoi më tej menaxheri i klubit kryeqytetas.

Ai konfirmoi gjithashtu se kërkesa e bërë nga ekipet e Vllaznisë dhe Pogradecit solli këtë situatë të pakëndshme.

“Janë këto dy skuadra, të cilat me sa duket frikën për t’u përballur në fushë me ekipin e Dinamos, zgjodhën ta zhvendosin në një përballje jo të drejtë jashtë fushe”, shtoi Bareti në intervistën e tij.

Ai deklaron se klubi mbetet në pritje të përgjigjeve të analizave për testin e shumëpërfolur të gjinisë.

comment Për komente lëvizni më poshtë
Sot mund të lexoni Shfletoni kopertinat