Një javë para pranverës pikërisht me 14 mars (e shtunë) të vitit 1987, palestra e sportit “25 maj” sot “1 Tetori” në Prishtinë, nuk kishte vend as për gjilpërë!
Vashat e Universitetit të Prishtinës, me një lojë brilante deklasuan Radniçkin e Kragujevcit, në kuadër të javës së 20-të të Ligës së Dytë të ish Jugosllavisë.
Derbi i madh dhe për vend të parë, e fituan vashat prishtinase në një atmosferë të rrallë, mbi tre mijë shikues.
Një atmosferë për mbamendje, me defa, daulle e instrumente tjera muzikore.
Kapitenja Resmie Juniku, së bashku me basketbollistet Xhevahire Mustafa, Shemsie Stublla e Serbeze Perani, i dhanë goditje përvëluese ekipit nga Kragujevcit.
Pas kësaj fitore, Universiteti triumfon edhe në Shabac ndaj Zorkës dhe pastaj në Prishtinë kundër Novi Pazarit, duke siguruar vendin e parë dhe në play-off-i edhe rikthimin në elitën e basketbollit të shtetit që nuk ekziston nga viti 1991.
Pas javës së 20-të, Universiteti kryesonte me 37 pikë, pasonin Studenti i Nishit me 36, Radniçki 36, Studenti (Sh) 33, Bilalateksi 33 pikë etj.
Universiteti - Radniçki 71:61 (38:24)
Palestra e sportit "25 maj", sot "1 Tetori" në Prishtinë.
Shikues: Mbi 3.000.
Me pesë gabime personale: Mustafa, Jankoviq - Millojeviq, Despotoviq e Çirkoviq.
Universiteti: Perani 12, Sahatçiu, Berisha, Stublla 10. Jankoviq 12, Saviq, Noshaj, Juniku 18, Mustafa 19 dhe Zylfiu.
Radniçki: Millojeviq 14, Panteliq 12, Çirkoviq 10, Pantoviq, Shakiq 3, Kovaçeviq 16, Matijasheviq 2, Despotoviq 2, Pavlloviq dhe Prekiq 2.