Vëllaznimi shënoi të dielën një fitore shumë të rëndësishme ndaj Borës, duke bërë një hap të madh për qëndrimin në elitën e basketbollit kosovar. E kësaj i kontribuoi më së shumti basketbollisti i Vëllaznimit, Jericole Hellems ku përveç fitores, 23 pikët, 8 kërcimet dhe 10 asistimet e tij ishin performanca që e shpallën më të mirin e xhiros së 18-të.
Poashtu është shpallur edhe pesëshja më e mirë e javës, ku listës i prijnë dy basketbollistët e Vëllaznimit. Tandemi Hellems dhe Anei dhuruan nga vetja 42 pikë, 15 kërcime dhe 12 asistime.
E treti është Shanon Shorter, nga radhët e Bashkimit me 24 pikë, pesë kërcime dhe tre asistime, në fitoren ndaj Prishtinës me rezultat 84-63.
Listës i shtohet Kenny Hasbrouck i Trepcës, i cili në fitoren ndaj Golden Eagle Yllit, dhuroi 27 pikë, një kërcim e asistim.
Pesëshen e kompleton “pejani” Oshowen Williams me 21 pikë, tre kërcime dhe shtatë asistime.
Pas kësaj xhiroje, në tabelë qëndron e para Trepca me 33 pikë e ndjekur nga Bashkimi me 30 dhe Vëllzanimi në vendin e parafundit me 24 pikë, duke lënë Rahovecin në vendin e fundit.