Klubi i basketbollit Vëllaznimi nga Gjakova ka triumfuar me rezultat 74:69 ndaj Sigal Prishtinës, në takimin e javës së 20-të të elitës së basketbollit të Kosovës.
Ndeshja u karakterizua edhe me një incident të rëndë.
Një tifoz hyri në parket dhe sulmoi gjyqtarin, ndërhyrja e menjëhershme e policisë rezultoi me arrestimin e tij.
Ndeshja u ndërpre vetëm 1 minutë e 26 sekonda para fundit, kur Vëllaznimi po udhëhiqte me rezultat 68:64.
Sfida vazhdoi.
“Fitore e madhe në shtëpi ndaj Prishtinës!
Në një ndeshje me intensitet tejet të lartë, ekipi reagoi mirë në momentet kyçe dhe ruajti ritmin deri në fund për të realizuar fitoren e madhe.
Lojtarët dhanë maksimumin në të dy anët e parketit dhe ruajtën qetësinë në momentet vendimtare.
Kjo fitore i dedikohet gjithë Gjakovës, sidomos atyre që besojnë edhe atëherë kur gjërat vështirësohen.
Vëllaznimi është i madh, emblematik”, shkruan në faqen e KB Vëllaznimit.
