Basketbollisti sllovak David Abrham kujton shumë mirë përballjen me Kosovën para pesë vitesh dhe para ndeshjes së sotme thekson se forca e ekipit të tij qëndron te loja në grup dhe te një përforcim i ri.
Të premten mbrëma, nga ora 19:00, Sllovakia do të përballet në Prizren me Kosovën, të cilën e ka takuar për herë të fundit në shkurt të vitit 2021. Kosova aktualisht renditet në vendin e 38-të në ranglistën evropiane të FIBA-s, pesë pozita më poshtë se Sllovakia.
Dy skuadrat u përballën në parakualifikimet për Kupën e Botës 2023. Në nëntor 2020, Sllovakia fitoi bindshëm 91:67 në Bratisllavë.
Në shkurt 2021, në Prishtinë, ishte një ndeshje dramatike që përfundoi me fitore të mysafirëve 77:73.
Nga ajo kohë, tre lojtarë aktualë të Sllovakisë i kujtojnë ato përballje: Shimon Krajçoviç, Tomash Pavelka dhe David Abrham.
“E mbaj mend shumë mirë atë ndeshje, sepse ishte gjatë pandemisë Covid dhe luajtëm pa tifozë.
Gjithçka ishte në lojë. Ishim në disavantazh, por në fund të çerekut të tretë dhe në fillim të të katërtit e përmbysëm rezultatin dhe fituam.
Të dy ekipet kanë ndryshuar që atëherë, kështu që ndeshja e së premtes do të jetë ndryshe,” u shpreh Abrham.
Ai kishte realizuar 12 pikë në atë takim në Kosovë, ndërsa Krajçoviç luajti plot 40 minuta. Shënuesi më i mirë ishte Vladimír Brodziansky me 28 pikë, i cili këtë herë mungon.
“Besoj se loja jonë ekipore mund ta bëjë dallimin. Do të kemi edhe një organizator të ri, David DeJulius. Mendoj se do të jetë i rrezikshëm. Kosova do të jetë e kujdesshëm ndaj tij, por një lojtar me cilësitë e tij di çfarë të bëjë. Kjo mund të jetë forca jonë,” tha 29-vjeçari.
“Nuk do ta kemi të lehtë. Ata luajnë në shtëpi dhe presim atmosferë të zjarrtë. Kanë lojtarë me përvojë. Por ne kemi planin tonë dhe nëse e zbatojmë si duhet, duhet të dalim me sukses,” shtoi ai.
Abrham mungoi në nëntor për arsye shëndetësore, por tani është rikthyer me entuziazëm në kombëtare. Para këtij sezoni ai u transferua te Slovan Bratisllava, ku mesatarisht luan 26 minuta dhe realizon 7.8 pikë për ndeshje.
“Gjithmonë jam i lumtur kur rikthehem në kombëtare. Është një ndryshim i bukur nga ambienti i klubit. Kemi grup të shkëlqyer dhe atmosferë shumë të mirë”, - përfundoi Abrham.
