Coachella, një nga skenat më ikonike të muzikës në botë, këtë vit u takua me Jennie – jo si një anëtare e Blackpink, por si një artiste solo, e gatshme të tregojë historinë e saj përtej kufijve të K-pop-it.
Po, Jennie tashmë ka bërë histori në këtë festival – në vitin 2023, ajo performoi në skenën kryesore si pjesë e Blackpink, grupi i parë K-pop që udhëhoqi Coachella-n.
Por këtë herë, prania e saj kishte një tjetër ritëm, një tjetër ngjyrim. Siç po ndodh edhe me anëtaren tjetër të grupit, Lisa, edhe Jennie është duke ndërtuar një identitet të ri, të vetëm, të guximshëm.
Nga interpretimi i saj në serialin "The Idol" të HBO-së, që shënoi debutimin e saj si aktore në një produksion ndërkombëtar, e deri te publikimi i albumit të saj të parë solo, “Ruby”, Jennie po formëson një rrugë të re artistike. “Ruby” nuk është thjesht një projekt muzikor; është një reflektim i një Jennie-je që po eksploron tinguj të rinj, stil dhe emocione më personale.
Kjo është Jennie përtej skenës së grupit, përtej koreografive të sinkronizuara – një Jennie që po na prezanton me zërin dhe vizionin e saj unik. Dhe Coachella, si gjithmonë, u bë vendi ku ajo mund ta ndante këtë transformim me botën.
