Janë luajtur ditën e sotme katër ndeshjet e fazës çerekfinale të Kupës së Shqipërisë për grupmoshën 17 vjeç, ku janë përcaktuar edhe gjysmëfinalistët e këtij edicioni që janë Football Republic, Durrësi 04, Apolonia dhe Vllaznia.
Football Republic mundi me rezultatin e ngushtë 1-0 ekipin e Teutës, një ndeshje e vështirë për të dyja skuadrat. Pjesa e parë e lojës u mbyll me rrjeta të paprekura, teksa goli i vetëm i sfidës u shënua në minutën e 78-të nga Sogani për kryeqytetasit, duke siguruar kështu biletën për në gjysmëfinale.
Ndërkaq, në sfidën tjetër mes Durrësi 04 dhe KF Tirana, ishin durrsakët ata të cilët buzëqeshën në fund, pasi u treguan më të saktë nga 11 metërshat, duke fituar me rezultatin 5-4 dhe duke kaluar kështu fazën tjetër.
Football Republic 1-0 KF Teuta
Durrësi 04 0-0 KF Tirana (5-4 me penallti)
Në ndeshjet e orës 12:00, Apolonia dhe Vllaznia janë dy ekipet e tjera që kalojnë në gjysmëfinale.
Fierakët kishin përballë në këtë fazë ekipin e Briansit, ku arritën të fitonin e ta mbyllnin ndeshjen me shifrat 3-2. Kurti kaloi në avantazh ekipin e Apolonisë që minutën e 29-të të takimit, me pjesën e parë që mbyllet me epërsinë e jugorëve. Me nisjen e fraksionit të dytë, lezhjanët barazojnë shifrat, por Zoga e Çakaj realizojnë dy gola të shpejtë në minutat 73’ dhe 78’. Në minutën e fundit të kohës së rregullt, ekipi i Briansit shënon edhe golin e dytë, por që nuk ndikoi në rezultatin final 3-2, që sheh Apoloninë në gjysmëfinalen e Kupës së Shqipërisë për grupmoshën U-17.
Nga ana tjetër, Vllaznia fitoi me rezultatin e pastër 0-3 në ndeshjen e zhvilluar kundër Internacional Tiranës. Pjesa e parë u mbyll me rezultatin e bardhë 0-0, teksa në fraksionin e dytë, shkodranët realizuan tre gola që i dhanë fitoren dhe biletën e fazës tjetër.
Apolonia 3-2 Brians
Internacional Tirana 0-3 Vllaznia
Ndërkaq, sipas skemës së përcaktuar, janë zbuluar edhe dy ndeshjet e fazës gjysmëfinale, ku Football Republic do të ketë përballë ekipin e Durrësit 04 ndërsa Apolonia do të ndeshet me Vllazninë.
Ndeshjet e fazës gjysmëfinale të Kupës së Shqipërisë për grupmoshën U-17
Football Republic – Durrësi 04
Apolonia – Vllaznia
