Karim Benzema ka treguar se është një prej lojtarëve më në formë në futbollin botëror me golat e tij të cilët ndihmuan Real Madrid që të kualifikohej në çerekfinalet e Ligës së Kampioneve.
Sulmuesi i Real Madrid shënoi tre herë në portën e PSG-së, duke u bërë lojtari i parë që ia bënte një gjë të tillë parisienëve në historinë e tyre në këtë turne në fazën me eliminim direkt.
Ndërkohë, ai vendosi një rekord në Ligën e Kampioneve, pasi në moshën 34 vjeç e 80 ditë, u bë futbollisti më i vjetër që shënonte 3 gola në një ndeshje. Rekordin e mëparshëm e mbante Zhiru me 34 vjet e 63 ditë, kur shënoi me fanellën e Çelsit ndaj Seviljes në vitin 2020.
Por këto gola të sotëm e rritën edhe më shumë mitin e tij në Madrid, pasi ai regjistroi sot golin e 309 në të gjithë kompeticionet me fanellën e madrilenëve, duke kaluar legjendën Di Stefano. Para tij mbetet vetëm Raul me 323 gola dhe Ronaldo me 451. Ndërkohë, ai kaloi Eaul në Ligën e Kampioneve me golin e 67 në këtë turne, kundër 66 të ish-kapitenit.
