Lapraka ngre lart trofeun e kampiones

Futboll

Lapraka ngre lart trofeun e kampiones

Më: 25 qershor 2022 Në ora: 13:14
Lapraka ngre lart trofeun e kampiones

Lapraka është shpallur kampione e edicionit të dytë të kampionatit rajonal për femra U-14 në zonën e Tiranës. Ky kampionat u zhvillua nga Zyra Rajonale e Tiranës për gjashtë muaj me radhë, nga janari në muajin qershor, ku 13 skuadra vajzash u bënë pjesë e kësaj gare, që ka si synim argëtimin dhe afrimin e vajzave të vogla me sportin më popullor në Shqipëri.

Kampionati ishte i organizuar në dy grupe, ku njëri grup përbëhej nga gjashtë skuadra, ndërsa grupi tjetër nga shtatë skuadra, me ndeshjet që u zhvilluan me sistemin vajtje-ardhje. Dy ekipet më të mira të çdo grupi kaluan në fazën play-off, ku fillimisht u zhvilluan gjysmëfinalet, ndërsa në finale Lapraka kishte përballë ekipin e FC Ternit ku arriti të triumfojë me shifrat 4-1 në ndeshjen e zhvilluar në fushën sportive pranë shkollës Harry Fultz.

Kupa e kampiones së këtij edicioni iu dorëzua ekipit të Laprakës nga shefi i Zyrës Rajonale Tiranë, Agim Mone, dhe nga kapitenia e ekipit Kombëtar të femrave, Megi Doçi, të cilët përgëzuan vajzat për të gjitha ndeshjet e zhvilluara përgjatë këtij edicioni dhe i motivuan të vazhdojnë më tej me këtë sport.

Ky është një tjetër kampionat mjaft i rëndësishëm, ashtu sikurse kampionati U-16 i femrave që u zhvillua për herë të parë në këtë edicion, ku Vllaznia u kurorëzua kampione. Këto kampionate, së bashku me kampionatin e shkollave 9-vjeçare kanë si qëllim kryesor masivizimin e futbollit të femrave dhe argëtimin e vajzave të vogla.

Federata Shqiptare e  Futbollit është dhe do të vijojë të jetë një mbështetje e madhe në krah të të gjitha vajzave që luajnë futboll, teksa ky është edhe një nga prioritetet kryesore në strategjinë “Futbolli për Kombin 2022-2025”.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat