Emanuele Ndoji po kalon një periudhë fantastike me Breshian.
Mesfushori shqiptar ka rilindur me klubin italian, ku është rikthyer më i fortë se më parë. Përpos lojës së mirë, 25-vjeçari ka dhënë kontributin e tij edhe me gola. Një kryevepër nga distanca mbrëmjen e djeshme i dha edhe fitoren Breshias kundër Sudtirolit.
Por në momentin kur morali i lojtarit shqiptar ka shkuar lart, makthe nga e shkuara i rikthehen.
Nëse ka një problem që e ka përndjekur përgjatë karrierës, ato kanë qenë dëmtimet.
Lëndimet e shumta i kanë kushtëzuar karrierën, kur rasti më i dhimbshëm për të ka qenë në kohën kur Breshia u ngjit në Serie A dhe Ndoji pritej të ishte xhevahiri më i çmuar i tyre. Por dëmtimet e shumta bënë që ta ndiqte pjesën më të madhe të sezonit nga stoli.
Mbrëmjen e djeshme mesfushori la fushën përpara kohe duke çaluar. Një lëndim në këmbë e detyroi të largohej nga fusha dhe në fytyrën e tij u dallua qartë frika për një përsëritje të historisë.
Por Ndoji mund të qetësohet plotësisht. Seanca e sotme ishte e fundit e diferencuar për të, pasi nesër do të bashkohet me grupin për të vazhduar stërvitjen normalisht. Fati i buzëqesh në momentin më të mirë, teksa lëndimi i lehtë nuk do i prishë formën e jashtëzakonshme që ka arritur këtë periudhë te Breshia.
