Resuli nis punën tek Flamurtari

Futboll

Resuli nis punën tek Flamurtari

Më: 30 nëntor 2023 Në ora: 22:06
Resuli

Nuk ka zgjatur shumë mungesa e një trajneri në stolin e Flamurtarit, pasi një ditë pas shkarkimit të Emiljano Çelës, klubi ka zyrtarizuar trajnerin e ri dhe është Dritan Resuli ai që merr drejtimin e skuadrës vlonjate.

Akordi ishte arritur që të hënën në fakt, por formalitetet u kryen të mërkurën, teksa trajneri u prezantua para medieve nga Drejtori sportiv i Flamurtarit, Alfred Ferko, i cili tregoi shkakun që zgjodhën pikërisht 47-vjeçarin në stol, ndërsa sqaroi edhe çështjen e objektivave, teksa misioni “Superiore” mbetet i pandryshuar.

Dritan Resuli është larguar nga Flamurtari në shtator të 2022-shit, e megjithatë kurrë nuk është ndier i shkëputur, pasi e ka ndier veten pjesë të kuqezinjve dhe kësaj i ka mëshuar edhe gjatë deklaratës së dhënë pas rikthimit, teksa theksoi se do të punojë shumë dhe sidomos në anën psikologjike të skuadrës.

Krahas tij si zëvendëstrajner do të jetë ish-futbollisti i vlonjatëve, Ditmar Bicaj. Resuli dhe Bicaj kanë nisur menjëherë nga puna me objektivin e klubit që mbetet i njëjtë, rikthimi i Flamurtarit në Superiore.

Të enjten ata ka zhvilluar edhe seancën e parë stërvitore me skuadrën, në përgatitje për sfidën e radhës që vlonjatët do të zhvillojnë në shtëpi përballë Kastriotit. Kjo ndeshje luhet të shtunën pasdreke, duke nisur nga ora 13:30, ndërsa Flamurtari mban vendin e 4-t në renditje, me 24 pikë, 8 më pak se Bylisi kryesues, por dy më pak sesa Elbasani i vendit të dytë, teksa vetëm dy vendet e para ngjiten automatikisht në Kategorinë Superiore, ndërsa skuadrat nga vendi i 3-të, në të 6-in përfshihen në “play-off”-in për t’u përballur me të 8-tën e Kategorisë Superiore, që do të përcaktojë se cila skuadër do të mbetet në nivelin më të lartë të Kampionatit Kombëtar të Futbollit.

comment Për komente lëvizni më poshtë
Sot mund të lexoni Shfletoni kopertinat