Magani, trajneri i ri i Tiranës?

Futboll

Magani, trajneri i ri i Tiranës?

Më: 5 nëntor 2024 Në ora: 22:14
Gugash Magani

Gugash Magani është trajneri i ri i Tiranës.

Burime pranë klubit bardheblu konfirmojnë për RTSH Sport ardhjen e trajnerit 59-vjeçar në krye të skuadrës 26 herë kampione e Shqipërisë. Magani ka qenë trajner i Tiranës për dy sezone, kjo në periudhën 2013-2015. Dhe nga 1 dhjetor 2013 deri më 17 maj 2015 e ka drejtuar Tiranën në 68 ndeshje në të cilat ka marrë 36 fitore, 19 barazime dhe 13 humbje.

Në fakt Magani duket se ka qenë kandidatura e vetme për të zëvendësuar Bledi Shkëmbin në këto momente. Madje pozicionin e ri në krye të Tiranës, kjo për RTSH Sport, e ka konfirmuar dhe vetë trajneri i ri i bardhebluve, Gugash Magani, i cili e pret me padurim startin e ri në këtë detyrë.

Më parë Magani ishte në krye të Lushnjës, ndërsa pat dhënë dorëheqjen pas eliminimit në Kupën e Shqipërisë nga Oriku në atë humbje në stadiumin “Roza Haxhiu”, 0-1. Më parë Magani ka drejtuar dhe Shkumbinin, Flamurtarin, Besën, Teutën, Egnatian.

Po kështu ka drejtuar dhe Trepça’89 në Kosovë. E në këtë mënyrë, Gugash Magani pritet të jetë ai që do të mund të nxjerrë Tiranën nga vështirësia ku ndodhet.

comment Për komente lëvizni më poshtë
Sot mund të lexoni Shfletoni kopertinat