Synohet rinovimi para Kupës së Botës

Futboll

Synohet rinovimi para Kupës së Botës

Më: 25 janar 2026 Në ora: 16:02
Harry Kane

Harry Kane vazhdon të jetë një pikë kyçe në makinerinë e Bayern Munich, ndërsa drejtuesit e klubit bavarez po përgatiten t’i ofrojnë një zgjatje kontrate sulmuesit anglez, mes interesimit në rritje nga klubet e mëdha evropiane.

Kane, i transferuar nga Tottenham Hotspur në vitin 2023, ka kontratë me Bayernin deri në vitin 2027, por klubi gjerman dëshiron ta blindojë më herët të ardhmen e kapitenit të Anglisë.

Sipas raportimeve, bisedimet për rinovimin pritet të nisin në shkurt, ndërsa synimi kryesor është që marrëveshja të finalizohet para Kupës së Botës.

32-vjeçari po kalon një tjetër sezon mbresëlënës me fanellën e Bayernit. Deri në ndeshjen e fundit ndaj Union Saint-Gilloise, Kane ka realizuar 36 gola nga 105 të shënuar gjithsej nga skuadra këtë sezon, duke kontribuar drejtpërdrejt në rreth një të tretën e golave të ekipit.

Përtej statistikave, Kane ka qenë vendimtar edhe në fazën e ndërtimit të lojës dhe në aspektin defensiv, duke u shndërruar në një lider të padiskutueshëm në fushë.

Në negociatat për kontratën e re pritet të përfshihet drejtpërdrejt edhe CEO i Bayern Munich, Jan-Christian Dreesen, i cili ishte një nga figurat kryesore në transferimin e Kane nga Tottenham në verën e vitit 2023.

Bayern Munich synon ta mbajë Kane si boshtin e projektit afatgjatë dhe një rinovim i shpejtë do t’i jepte stabilitet klubit në prag të sfidave të mëdha që vijnë në arenën evropiane dhe ndërkombëtare.

comment Për komente lëvizni më poshtë
Sot mund të lexoni Shfletoni kopertinat