Mbrojtësi i Interit, Stefan de Vrij, pritet të rinovojë edhe për një vit kontratën e tij me klubin zikaltër.
Sipas raportimeve nga mediat italiane, holandezi është gati të firmosë marrëveshjen e re që do ta mbajë lidhur me kampionët e Serie A deri në verën e vitit 2027.
Drejtuesit e klubit po synojnë një reduktim të lehtë të pagës së lojtarit në kontratën e re, teksa bisedimet mes palëve janë në fazën finale.
Koha mbetet një faktor kyç në këtë proces, duke qenë se kontrata e tij aktuale përfundon në fund të këtij sezoni. Për qendërmbrojtësin 34-vjeçar kishin shfaqur interes disa skuadra të njohura si Benfica, Olympiacos, si dhe klube nga Anglia, Turqia dhe Arabia Saudite, por dëshira e lojtarit është qëndrimi në Milano.
Kujtojmë që De Vrij iu bashkua Interit si lojtar i lirë nga Lazio në verën e vitit 2018, duke regjistruar deri më tani 13 gola e 8 asistime në 295 paraqitje zyrtare.
