Heroi i finales, Ferran Torres, ia dedikoi golin e tij gjithë popullit spanjoll.
Spanja triumfoi pas 120 minutave, me rezultat 1:0 ndaj Argjentinës.
Spanja është kampion i ri i botës.
“Besoj se në fund goli është i 47 milionë njerëzve, jo imi.
Fati ishte shkruar, ishte bërë që ne të fitonim”, deklaroi ai.
Torres pranoi se përballja me Argjentinën e Lionel Messit krijoi tension të madh.
“Të gjitha finalet janë të vështira. Kur ke Messin në ekipin kundërshtar, gjithmonë ekziston ai nervozizëm, por ne vareshim nga vetja jonë dhe e treguam edhe një herë”.
Lidhur me golin vendimtar, sulmuesi spanjoll foli edhe për kritikat që kishte marrë gjatë turneut.
“Ishte një çlirim shumë i madh. Kam qenë një person shumë i kritikuar gjatë gjithë Botërorit, por fati është i shkruar dhe falënderoj Zotin që gjithmonë më jep forcë për të vazhduar. Siç them gjithmonë, Zoti ia jep gjërat atij që i meriton më shumë”.
