Pochettino shpreh zemërimin: Nuk e prisja ta nisja kështu aventurën

Futboll

Pochettino shpreh zemërimin: Nuk e prisja ta nisja kështu aventurën

Nga: B.S. Më: 22 nëntor 2026 Në ora: 21:00
Pamje nga ndeshja Liverpool - Manchester United

Trajneri i Manchester Unitedit, Mauricio Pochettino, ka shprehur zemërimin dhe zhgënjimin e tij pas humbjes së thellë 4:0 ndaj Liverpoolit në “Anfield”, në mbrëmjen e së dielës.

Pochettino, i cili zëvendësoi Michael Carrickun në stolin e Manchester Unitedit gjatë pushimit të fundit ndërkombëtar, e nisi në mënyrën më të keqe aventurën e tij në krye të skuadrës angleze.

Sipas tij, gjithçka ndryshoi pas vetëm 8 minutash lojë, kur Manchester Unitedi mbeti me një futbollist më pak, pas përjashtimit me karton të kuq të Leny Yoros.

“Është shumë e dhimbshme dhe ndihem jashtëzakonisht i zhgënjyer. Është e pabesueshme që aventurën time në Premier League ta nis në këto rrethana. Problemi i vetëm është se ndeshja ndryshoi plotësisht pas gjashtë minutash. Tani mund të flasim dhe të shpjegojmë gjithçka, por dëmi tashmë është bërë”, deklaroi Pochettino për Sky Sports.

Trajneri argjentinas tha se lojtarët e tij ishin ndikuar shumë nga ajo që ndodhi në fillim të ndeshjes.

“Lojtarët e ndiejnë dhimbjen e një situate të tillë. U thashë se duhet të qëndronin të qetë dhe të ruanin gjakftohtësinë, edhe pse ajo që ndodhi ishte krejtësisht e padrejtë”, u shpreh ai.

Pochettino kundërshton kartonin e kuq

Pochettino nuk u pajtua me vendimin e gjyqtarit për përjashtimin e Leny Yoros në minutën e tetë, duke pretenduar se mbrojtësi nuk kishte ndërmend ta pengonte sulmuesin kundërshtar, Alexander Isak.

“Topi po shkonte drejt portierit. Mendoj se në atë situatë, po ta shikoni VAR-in, do të shihni se Leny Yoro nuk kishte aspak qëllim ta rrëzonte Alexander Isakun. Sulmuesi e pa se topi po shkonte drejt portierit, e ngadalësoi pak vrapimin dhe më pas u rrëzua”, deklaroi trajneri.

Ai gjithashtu kërkoi që të rishikohej edhe një ndërhyrje në minutën e gjashtë ndaj Bryan Mbeumos, duke pretenduar se Manchester Unitedi duhej të fitonte penallti.

“Duhet ta pranojmë se kemi nevojë të përmirësojmë përqendrimin, të marrim vendime më të mira në fushë dhe të luajmë më mirë. Duhet ta kritikojmë edhe veten, por njëkohësisht duhet të diskutojmë edhe për disa situata gjatë ndeshjes me të cilat nuk jemi pajtuar”, theksoi Pochettino.

Në fund, trajneri i Unitedit përsëriti bindjen e tij se Yoro nuk e meritonte kartonin e kuq.

“Respekti është jashtëzakonisht i rëndësishëm, por unë duhet ta mbroj skuadrën time dhe ta shpreh mendimin tim. Besoj se ky aksion ishte i qartë për të gjithë botën e futbollit dhe nuk meritonte karton të kuq”, përfundoi Pochettino.

Sot mund të lexoni Shfletoni kopertinat