Ardon Jashari ka shënuar golin e tij të parë në këtë edicion të Serie A, duke shkëlqyer në fitoren e thellë të Milanit me rezultat 5:1 ndaj Frosinones.
Futbollisti shqiptar tregoi cilësitë e tij në fanellën kuqezi, duke kontribuar në suksesin e Milanit në ndeshjen e zhvilluar në stadiumin “San Siro”.
Jashari u aktivizua në fillim të pjesës së dytë dhe vetëm dy minuta më vonë, në minutën e 48-të, realizoi një gol të jashtëzakonshëm pas një aksioni individual.
https://t.co/rRS25YzKMZ
— 📁 (@burner232ux) November 22, 2026
Në minutën e 4-t, Gabriele Calvani (Frosinone) shënoi autogol, duke i dhënë epërsinë Milanit.
Në minutën e 20-të, Milani dyfishoi epërsinë. Adrien Rabiot asistoi për Gonçalo Ramosin, i cili fitoi duelin me mbrojtësit dhe nga brenda zonës e dërgoi topin në këndin e poshtëm të djathtë për 2:0.
Mysafirët ngushtuan epërsinë në minutën e 25-të. Patrizio Masini përfitoi nga një pasim i shkëlqyer, doli i vetëm përballë portierit dhe me qetësi realizoi për 2:1.
Në minutën e 48-të, Jashari tregoi klas të lartë. Pas një depërtimi fantastik individual, futbollisti shqiptar hyri në zonën e rreptësisë dhe me një goditje të saktë e dërgoi topin në këndin e epërm të djathtë për 3:1, duke e lënë portierin Lorenzo Palmisani të pafuqishëm.
Milani vazhdoi dominimin edhe në minutat në vijim. Në minutën e 62-të, Alphadjo Cisse pranoi një pasim të bukur brenda zonës dhe me qetësi realizoi për 4:1.
Gjashtë minuta më vonë, Christian Pulisic shënoi një gol spektakolar pas një depërtimi individual, duke e kaluar portierin me një goditje të bukur mbi të për rezultatin përfundimtar 5:1.
Me këtë fitore, Milani ngjitet në vendin e katërt me 27 pikë, ndërsa Frosinone renditet në vendin e shtatë me shtatë pikë më pak.