Duke folur për mediat pas fitores 3-2 të Barcelonës ndaj Villarrealit, trajneri Hansi Flick kritikoi gjyqtarin Hernandez Hernandez për disa nga vendimet e tij gjatë ndeshjes.
Barcelona përmbysi disavantazhin prej dy golash për ta mposhtur Villarrealin 3-2 në Spotify Camp Nou, duke e ruajtur epërsinë prej tri pikësh në krye të tabelës.
Megjithatë, gjykimi ishte sërish në qendër të vëmendjes, pasi Hernandez Hernandez iu desh të konsultohej me VAR-in për t’i akorduar Barcelonës një penallti në pjesën e parë, pas një ndërhyrjeje të qartë në Lamine Yamal.
Situata u përkeqësua pas pushimit, kur Fermin Lopez u ndëshkua me karton të kuq derisa ndodhej në bankën rezervë, pasi protestoi për një faull ndaj Anthony Gordonit.
Pas ndeshjes, Flick shprehu pakënaqësinë e tij me gjyqtarin Hernandez Hernandez dhe vendimet e tij, duke thënë se Barcelona gjithmonë ka probleme me këtë arbitër.
“Ne gjithmonë kemi probleme të këtij lloji me këtë gjyqtar”, deklaroi ai, sipas “AS”.
I pyetur për kartonin e kuq të Ferminit, trajneri gjerman tha se as vetë nuk e dinte se çfarë kishte ndodhur, ndërsa për shkak se kishte kërkuar sqarime për të njëjtën çështje, ishte ndëshkuar edhe ai me karton të verdhë.
“Nuk e di çfarë ndodhi me Ferminin. Gjyqtari i katërt vazhdimisht po e shikonte bankën tonë rezervë. Nuk e di çfarë ndodhi, por kur pyeta për këtë, përgjigjja që mora ishte kartoni i verdhë”, u shpreh Flick.
Më tej, ai shtoi: “Nuk e di, unë isha i përqendruar te loja dhe te mbështetja e ekipit në fushë. Gjithmonë kemi këto probleme me këtë gjyqtar. Na ka ndodhur edhe më parë. Është gjithmonë e njëjta gjë. Kur e sheh atë që ndodhi me Lamine, ishte një faull i qartë”.
Duke folur për paraqitjen e skuadrës, Flick u shpreh i kënaqur me mënyrën se si lojtarët reaguan në pjesën e dytë dhe arritën ta përmbysnin rezultatin.
“Ata shënuan dy gola nga dy gabimet tona në dy aksionet e para, por edhe në pjesën e parë luajtëm mirë dhe krijuam disa raste të mira.
Jam i lumtur sepse në pjesën e dytë luajtëm me më shumë organizim sesa në të parën dhe e merituam fitoren”, përfundoi trajneri i Barcelonës.
Ndeshjen e radhës, Barcelona do ta zhvillojë në udhëtim në Azerbajxhan, ku javën e ardhshme do të përballet me Sabahun në kuadër të Ligës së Kampionëve./