Në tri ndeshjet e para të sezonit të Real Madridit ndaj Espanyolit, Real Sociedadit dhe Málagës, Yan Diomande ka luajtur përkatësisht 25, gjashtë dhe 26 minuta.
Për tifozin mesatar, kjo është shumë pak për transferimin më të shtrenjtë në historinë 124-vjeçare të klubit.
Real Madridi pagoi 146 milionë dollarë për Diomanden, yllin 19-vjeçar në ngritje nga Bregu i Fildishtë, i cili ka mahnitur botën e futbollit dhe vetëm dy vite më parë luante për Leganés B.
Potenciali i tij tashmë po krahasohet me atë të Lamine Yamalit.
Por José Mourinho po qëndron i qetë dhe po i përmbahet planit të veçantë që ka hartuar për të.
Kjo nënkupton largimin e presionit, respektimin e kohës së zhvillimit të futbollistit dhe sigurimin që klubi të mos e përshpejtojë procesin, duke rrezikuar dëmtimin e këtij talenti.
Diomande pritet të ketë një rol shumë të rëndësishëm në këtë skuadër të Real Madridit. Ai është “Galáctico” që klubi ka transferuar, por Mourinho e përmblodhi qartë mënyrën e tij të të menduarit për talentin e ri pas ndeshjes ndaj Málagas.
“Duhet ta marrë hap pas hapi. Ai punon shumë dhe punon mirë. Është i hapur dhe modest, dëshiron të mësojë, i dëgjon bashkëlojtarët e tij dhe do të rritet. Nuk mund të shikoj shifrën prej 130 apo 140 milionë dollarësh…
Sa kemi paguar për të? Duhet të shikoj një futbollist që vjen pas një sezoni të nivelit të lartë te Leipzigu. Kur flasim për një shifër kaq të madhe, flasim për dikë që vjen dhe shkatërron gjithçka. Por nuk është kjo situata. Ai është një djalosh i ri. Qetësi, ta marrë shtruar”, tha Mourinho.
Mourinho po arrin dy objektiva njëkohësisht duke i marrë gjërat ngadalë me reprezentuesin e Bregut të Fildishtë. Nga njëra anë, ai po respekton kohën që futbollistit i nevojitet për t’u përshtatur. Nga ana tjetër, po tregohet i drejtë me futbollistë si Arda Güler dhe Brahim Díaz, të cilët patën para-sezone shumë të mira dhe e kanë fituar statusin e tyre në skuadër ndër vite.
Kjo është diçka që, për shembull, Xabi Alonso nuk e respektoi kur ngriti në hierarki të sapoardhurin Franco Mastantuono, në dëm të futbollistëve si Rodrygo, Brahim dhe madje Vinicius. Duke vepruar kështu, ish-trajneri i Real Madridit e hodhi argjentinasin menjëherë në një situatë të vështirë, përpara se ai të ishte gati për të qenë titullar i padiskutueshëm, ndërsa dhoma e zhveshjes doli nga kontrolli i tij.
Me këtë qasje, Mourinho po e mbron Diomanden në mënyrë që ai të mund të shkëlqejë në të ardhmen. Ai gradualisht do të luajë më shumë minuta dhe, nëse gjithçka shkon sipas planit, përfundimisht do ta fitojë një vend titullari, por pa ndier presionin për të dhënë menjëherë rezultate.
Ndërkohë, Mourinho po i kushton shumë kohë në stërvitje, në mënyrë që sulmuesi të kuptojë lëvizjet e skuadrës dhe dinamikat taktike.
Nga ana e tij, futbollisti e kupton situatën. Ai i beson trajnerit të tij dhe nuk e ka humbur buzëqeshjen. Gjithashtu, ai mbetet i qetë pavarësisht se tashmë është testuar në nivelin më të lartë.
Sezonin e kaluar, ai luajti në 33 nga 34 ndeshjet e Leipzigut në Bundesliga, duke qenë titullar në 28 prej tyre. Ai shënoi 12 gola dhe dhuroi tetë asistime.
“Mourinho më zgjoi në orën 5 të mëngjesit për të folur me mua. Më tha: ‘Të dua në skuadrën time’”, zbuloi Diomande pak kohë pasi iu bashkua Real Madridit, në intervistën e tij të parë për platformën afrikane “SportyTV”.
“Dhe unë i thashë: ‘Nëse dëshiron që të vij, sigurisht që do të vij’. Ai është mik dhe shef. Do të vdes për Mourinhon”, tha Diomande./
