Policia kroate në qytetin e Splitit ka arrestuar të paktën 12 tifozë të Hajduku i Splitit pas trazirave dhe thirrjeve antisemite të regjistruara gjatë ndeshjes ndaj Ajaxit.
Ngjarjet e rënda ndodhën përpara përballjes së Ligës së Konferencës, ku mbështetësit vendas marshuan me parulla diskriminuese dhe thirrje në mbështetje të ideologjisë naziste.
Tifozët e Hajdukut parakaluan pas një veture me një arkivol simbolik që mbante emrin e klubit holandez, i lidhur historikisht me komunitetin izraelit.
Përveç koreve raciste, tifozët u përplasën me forcat e rendit dhe hodhën fishekzjarre në fushë, duke detyruar ndërprerjen e ndeshjes për 12 minuta.
Presidenti i Kroacisë, Zoran Milanoviq, së bashku me qeverinë dhe Ambasadën e Izraelit në Zagreb, dënuan ashpër incidentin dhe kërkuan ndëshkime të rrepta. Drejtuesit e Federatës Kroate të Futbollit deklaruan se kjo sjellje dëmton rëndë imazhin e sportit dhe vlerat themelore të tolerancës.
Pavarësisht fitores 2-1 të Hajduk Splitit në fushë, klubi përballet tashmë me masa të rënda disiplinore nga UEFA.
Përmes një komunikate zyrtare, drejtuesit e Hajdukut kërkuan ndjesë publike dhe u shprehën të gatshëm të mbajnë përgjegjësitë e tyre.