Real Madridi e mori një fitore të rëndësishme 2-1 ndaj Barcelonës në “Camp Nou”, rezultat që jo vetëm e afroi në tri pikë me rivalin katalanas, por edhe riktheu besimin te projekti i trajnerit José Mourinho.
Sipas mediumit spanjoll “Defensa Central”, presidenti Florentino Perez u ka përcjellë urimet lojtarëve dhe stafit teknik për paraqitjen në El Clásico.
Perez nuk ishte i pranishëm në stadium, për shkak të marrëdhënieve të tensionuara mes dy klubeve, por e dërgoi një përfaqësues dhe më pas shprehu vlerësimin për skuadrën.
Mbappé e Bellingham, liderët e projektit
Fitorja ishte një lehtësim i madh edhe për Mourinhon, i cili ishte përballur me kritika dhe dyshime pas paraqitjeve të mëparshme të ekipit.
Suksesi në Barcelonë i dha trajnerit portugez një përgjigje të rëndësishme dhe përforcoi besimin e klubit te puna e tij.
Në qendër të vëmendjes ishin Kylian Mbappé dhe Jude Bellingham, të cilët patën ndikim të rëndësishëm në fitore. Të dy konsiderohen pjesë thelbësore e projektit të Real Madridit.
Güler dhe Camavinga fitojnë pikë
Krahas Mbappes e Bellinghamit, vlerësim të veçantë nga Perez morën edhe Arda Güler dhe Eduardo Camavinga.
Klubi ka pritshmëri të mëdha për turkun, të cilin e sheh si njërin prej organizatorëve kryesorë të lojës në të ardhmen.
Ndërkohë, Camavinga iu përgjigj kritikave me paraqitjen e tij ndaj Barcelonës, duke e rikthyer besimin te vetja.
Të dy futbollistët e forcuan bindjen e Perezit se mund të kenë rol të rëndësishëm në skuadër.
Megjithatë, presidenti i Real Madridit e di se një fitore ndaj Barcelonës nuk mjafton.
Suksesi i projektit do të matet me vazhdimësinë e paraqitjeve dhe trofetë në fund të sezonit.