Vdekja tragjike e futbollistit të Tenerifes, Jesus de Miguel, pas përplasjes së rëndë gjatë ndeshjes kundër FC Andorrës, ka shkaktuar reagime të shumta në futbollin spanjoll.
Mes tyre është edhe ai i Gerard Pique, president i klubit FC Andorra, i cili shprehu dhimbjen për humbjen e lojtarit përmes një mesazhi në rrjetet sociale.
“Më vjen keq me gjithë shpirt. Pusho në paqe, Jesús”, shkroi ish-futbollisti i Barcelonës në platformën X, duke iu përgjigjur njoftimit të Tenerifes për ndarjen tragjike nga jeta të 29-vjeçarit.
Pique ishte i pranishëm në stadiumin “Heliodoro Rodríguez” gjatë ndeshjes së së hënës, ku ndodhi aksidenti fatal. Sipas raportimeve të mediave spanjolle, ai u largua shpejt nga stadiumi pas përplasjes së rëndë në fushë, e cila tronditi futbollistët dhe të pranishmit.
Edhe klubi Andorra reagoi përmes një mesazhi ngushëllimi, duke shprehur keqardhjen për humbjen e lojtarit të Tenerifes dhe duke përcjellë solidaritetin me familjen dhe të afërmit e tij.
Ngjarja ka lënë në zi të dy klubet dhe ka sjellë një valë mesazhesh ngushëllimi nga bota e futbollit spanjoll.