Në një takim me kongresmenë amerikanë, ku ka qenë i pranishëm edhe ambasadori serb në ShBA, Marko Gjuriq, Richard Grenell i cili tani po lobon për Serbinë, e ka paraqitur Milorad Dodikun, si faktor përçarës në Ballkan, ndërsa presidentin serb Aleksandar Vuçiq si partner dhe faktor stabiliteti.
Siç merr vesh gazeta “Vijesti”, Grenel e ka paraqitur Dodikun si një faktor të madh përçarës në Ballkan në një takim më 1 dhjetor me një grup kongresmenësh republikanë, ku mori pjesë edhe ambasadori serb Marko Gjuriq në hotelin Trump në Uashington dhe Vuçiq si një partner dhe politikan që ofron mundësi për stabilizim të rajonit.
Presidenti i Serbisë, Aleksandar Vuçiq, përmes lobitit Richard Grenel ofroi ndihmë për rënien politike të anëtarit serb të Presidencës së Bosnjë-Hercegovinës, Milorad Dodik.
Sipas “Vijesti”, Grenel, i cili ishte i dërguari special i ish-presidentit amerikan, Donald Trump për Kosovën dhe negociatat Beograd-Prishtinë, në atë takim e prezantoi Dodikun si një faktor të madh përçarës në Ballkan.
Ndër kongresmenët që morën pjesë në takim ishin Claudia Tenny , Mike Turner dhe Nicole Maliotakos. As ata dhe as Grenel nuk iu përgjigjën pyetjeve të “Vijesti” lidhur me atë takim.
Grenel deklaroi në takim se Vuçiq do të ishte i gatshëm të ndihmonte në tërheqjen ose largimin e Dodikut dhe se ai e ofroi Zeljka Cvijanoviqin si alternativë. Në këmbim, Vuçiq shpreson se kjo mund të përmirësojë imazhin e dëmtuar, veçanërisht në prag të zgjedhjeve që vijnë në pranverë.
Një grup kongresmenësh amerikanë nga demokratët së fundi i dërguan një letër presidentit amerikan Joe Biden, në të cilën kritikonin ashpër Presidentin e Serbisë për akuzat për korrupsion dhe presion brutal ndaj mediave, madje kërkonin shqyrtimin e sanksioneve.
Mediat në Serbi kanë shkruar edhe më herët për lidhjet mes Grenellit dhe Vuçiqit, si dhe është përcjellë pretendimi i Dushan Janjiq nga Forumi për Marrëdhënie Etnike se Serbia po i paguan shtrenjtë shërbimet e Grenelit, i cili në mënyrë jo bindëse u mohua nga qeveria serbe. Në media u raportua se Grenell ishte në një darkë me Vuçiqin dhe Ana Brnabiqin dhe u shfaq edhe një foto e Sinisha Malit nga klubi i natës Lafayette në Beograd.
Pavarësisht se demokratët kanë shumicën, ndikimi i Partisë Republikane është ende i madh dhe ata shpresojnë që në vitin 2022 të arrijnë të marrin shumicën në të dyja dhomat e kongresit, ndaj burimi i “Vijesti” thotë se nuk është e pazakontë që Vuçiq ende “e mban” Grenelin si lobist.
Cvijanoviç udhëtoi për në Shtetet e Bashkuara në nëntor dhe pati takime me njerëz nga Kongresi dhe administrata amerikane, por nuk kishte asnjë informacion zyrtar mbi temat e takimit.
“Vijesti” merr vesh se Vuçiq i është “ankuar” Dodikut dhe të dërguarit të Bashkimit Evropian për Ballkanin, Miroslav Lajçak, gjatë takimit të fundit në Beograd.
