Presidenti i Serbisë, Aleksandar Vuçiq, sot ka lënë të kuptohet se do t’i pranojë targat RKS, megjithatë ka insistuar që për serbët e veriut të mos kërkohen dokumente për hyrje-dalje. Këto deklarata shefi i shtetit serb i ka bërë gjatë një organizimi në Serbi.
Teksa iu është përgjigjur gazetarëve, Vuçiq ka thënë se dy emisarët, Escobar dhe Lajcak i kanë kërkuar që të respektojë marrëveshjen e vitit 2011 për lirinë e lëvizjes.
“Unë thash që jemi të gatshëm të respektojmë marrëveshjen”, ka thënë Vuçiq.
Ai tutje ka thënë se marrëveshja për lirinë e lëvizjes referohet për vendet tranzite dhe jo për serbët që jetojnë në Kosovë.
“Ju s’mund t’i ndaloni serbët që jetojnë në Kosovë e që kanë dokumente të Serbisë. Ne kërkojmë që ata të kenë të drejtën të lëvizin me dokumenta të Serbisë”, ka thënë Vuçiq, shkruan N1.
Ai tutje ka thënë se s’mund të negociohet për çështjen e tabelave meqë thotë se “është pothuajse e sigurt që s’do të ketë ndonjë progres”.
“Tabelat fillojnë të ndryshojnë nga 1 shtatori dhe afati është dy muaj. Imagjinoni çfarë tensione do të ketë në këta dy muaj. Nëse ne mund të zgjidhim të paktën çështjen e dokumenteve në mënyrë që serbët nga Kosova të mund të hyjnë dhe dalin në vijën administrative, gjithçka do të jetë më e lehtë”, ka thënë Vuçiq.
