Partia më e madhe serbe në Kosovë, Lista Serbe, e mbështetur nga Beogradi zyrtar, i ka dërguar një letër shteteve të Quint-it në Kosovë.
Në letër, kjo parti flet për pretendime rreth “eksodit të serbëve” nga Kosova dhe “terrorit të Albin Kurtit” ndaj tyre – e krejt këto i ndërlidh me ndalimin e dinarit si valutë.
“Ne po ju drejtohemi në emër të popullit serb nga Kosova, duke ju përcjellë lutjet dhe pritshmëritë e popullit për të shfrytëzuar autoritetin tuaj të madh, personal, si dhe autoritetin e shteteve të respektuara që përfaqësoni në këtë rajon, për të ndalur urgjentisht eksodin e popullit tonë nga vatrat e tij shekullore”, thuhet në letrën në të cilën ka pasur qasje “Tanjug”.
Më tutje në letër thuhet se “dhuna kundër popullit serb” në Kosovë, e cila thuhet se “ka zgjatur më shumë se dy dekada, është intensifikuar që nga viti 2021 dhe me ardhjen e Albin Kurtit në pushtet”.
Thuhet po ashtu se qëllimi është “persekutimi dhe shkatërrimi i gjithçkaje serbe” në Kosovë dhe se “s’ka të drejtë të njeriut që regjimi i Albin Kurtit s’e ka shkelur kur flasim për serbët”.
E fundit, sipas Listës Serbe, “në serinë e masave drastike ndaj serbëve është vendimi për anulimin e dinarit, apo transaksioneve të pagesave, e cila shkakton kolaps financiar të popullit serb” në Kosovë.
Në letër, Lista Serbe thotë se janë 100 mijë serbë që do të mbesin pa të hyra me vendimin për ndalimin e dinarit.
“Nëse i marrim parasysh 31,831 paga, 29,115 pensione, 2,430 bursa, më shumë se 31,000 benefite sociale që paguhen nga buxheti i Serbisë, ky vendim do t’i lë 100 mijë serbë pa burim të hyrash”.
Kjo parti thotë se “përfaqësuesit e shteteve më të fuqishme në botë kanë kapacitetin për të siguruar se ky qëllim i Kurtit të mos realizohet dhe se veprimet e tyre të fuqishme dhe konkrete do të mund të ndalojnë eksodin e serbëve” nga Kosova.
Letra përmend edhe mbylljen e institucioneve paralele serbe në Kosovë, gjegjësisht në Pejë, Istog e Klinë, për të cilat thotë se “është dashur të jenë baza e themelimit të AKS-së si institucion ombrellë i popullit serb në Kosovë”.
