Vazhdon agonia e PDK-së

Opinione

Vazhdon agonia e PDK-së

Nga: Skender Musliu Më: 8 maj 2021 Në ora: 18:22
Skender Musliu

Opozita, në veçanti PDK-ja ende nuk po mund të pajtohet me faktin dhe fatin, që populli me votën e tyre i ndërshkoi për keqpërdorimet dhe keqqeverisjet 20 vjeçare, duke ua ulur atyre vlerën dhe pazarin politikë.

Nervozizmi i opozitës, e në veçanti i PDK-së, sikurse në mbledhjet e kaluara të Kuvendit, ashtu edhe në të fundit, nxjerri në pah papërgjegjshmërinë, arrogancën dhe mungesën e kulturës elementare të disa deputetëve, e sidomos të PDK-së.

Kjo gjuhë kaq e ulët e PDK-së u intensifikua pas një video, në të cilën Zonja Gërvalla në një intervistë në vitit 2016, kishte deklaruar se Hashim Thaçi, Kadri Veseli bashkë me SHIK-un duhet të japin llogari për vrasjet e veprimtarëve për periudhën para dhe pas luftës, por duke mos implikuar në asnjë rast UÇK-në. Duhet theksuar se në atë kohë Zonja Gërvalla nuk ka qenë në politikë, ka shprehur mendimin e saj personal, që përputhet me mendimin e pjesës dërmuese të qytetarëve të Kosovës.

Në seancën e fundit, për këtë intervistë Zonja Gërvalla, Minisistre e Punëve të Jashtme, në mënyrën më të vrazhdët dhe më mizore u kritikua nga disa deputet, e në veçanti nga Abelard Tahihi, i cili tha se Gjykata Speciale është formuar në bazë të kërkesës dhe provave të Serbisë dhe akuzoi Zonjën Gërvalla se Serbinë e ka sjellë në Kosovë, sepse ajo po e luan rolin e zëdhënësit të Vuçiqit. Po ashtu A.Tahiri i drejtohet Zonjës Gërvalla me, Zonja Schwarz, sepse nuk po mund t’a thërret me mbiemrin tjetër (Gërvalla) për shkak turpit. Kjo gjuhë e ulët, raciste dhe e urrejtjes e A.Tahirit ndaj Zonjës Gërvalla, i cili për fat të keq ka qenë edhe ministër i drejtësisë, është e papranueshme dhe denigruese.

Duhet përkujtuar këtij deputeti, se babai i Zonjës Gërvalla, i ndjeri Jusuf Gërvalla, të cilin e vranë UDB-ja serbe më 1982 në Gjermani, kur ishte përballur me regjimin kriminel serb, ky deputet ndoshta nuk ka qenë i lindur, dhe kur Zonja Gërvalla e ka senzibilizuar çështjen e Kosovës nëpër shumë qendra televizive në Gjarmani, dhe jo vetëm, duke debatuar me politikan serb, sikurse me Zoran Xhingjiqin ish kryeministër i Serbisë, A. Tahiri në atë kohë ka qenë fëmijë dhe hundët i ka pastruar me gushta.

Pse asnjëherë A.Tahiri nuk ka reaguan kundër Isa Mustafës dhe lidershipit të LDK-së, të cilët vazhdimisht kanë akuzuar H. Thaçin, K. Veselin dhe SHIK-un për vrasjet politike?!

Demagogjia e A. Tahirit, se Serbia e paska formuar Gjykatën Speciale, është rrenë e kulluar, sepse kjo Gjykatë është formuar me kërkesën e ndërkombëtarëve, në veçanti të SHBA-ve, kurse PDK-ja në krye me Hashim Thaqin, përmes presioneve ndaj deputetëve, e kanë instaluar, kurse tani derdhin lot krokodili kinse Serbia paska faj.

Veprimeve arrogante i është bashkangjitur edhe Memli Krasniqi, i cili pas një fjalosje, i bënë thirrje Ministrit për Bujqësi, Faton Pecit të del jashta sallës së Kuvendit për t’u marrür vesh. Edhe Ardian Kastrati, i cili para disa ditëve kishte ofenduar rëndë presidenten e Kosovës, Zonjën Osmani, kësaj rradhe ka ofenduar Zotin Peci duke thënë se ai është « legen » dhe « qenef ».

Është e turpshme dhe e neveritshme që dikush nga deputetët e PDK-së, kryesuesen e seancës së fundit të Kuvendit, zonjën Saranda Boguevci, e cila është edhe e mbijetuara e masakrës famailiare, t’a quaje « lavire »

Ky nivel i të shprehurit mund t’i përngjajë fjalorit të gangsterave dhe rrugaçëve dhe njerëzve asocial që janë në marigjinën e shoqërisë, e jo deputetëve.

Kuvendi i Kosovës është organi më i lartë, më vendimmarrës dhe më reprezentativ i shtetit, ku miratohet Kushtetuta, Ligjet, Rezolutat dhe akte tjera normative, dhe konform këtij serioziteti duhet të sillen deputetët. Mirëpo PDK-ja, nga mllefi që ka humbur pushtetin, të cilin vështirë se do t’a ketë më, Kuvendin e Kosovës e shëndrruar në arenë të luftës verbale duke sharë, fyer, kërcënuar në stilin e bandave kriminale dhe mafioze.

Madje edhe Ambasadori i Gjermanisë në Kosovë, Joern Rohde dënoi ashpër gjuhën denigruese që deputetët përdorën në Kuvendin e Kosovës, në veçanti kundër Zonjës Gërvalla.

Kuvendi i Kosovës, sa më shpejtë duhet të ndërrmer masa kundër instalimit të këtyre veprimeve dhe diskursit të ndytë, të ulët dhe të pamoralshëm të deputetëve.

Shfaq komentet
comments powered by Disqus
Sot mund të lexoni Shfletoni kopertinat