Këshilltari i Behgjet Pacollit dhe anëtari i Aleancës Kosova e Re, Jetlir Zyberaj ka bërë të ditur se ka bisedime mes AKR-së dhe LDK-së për koalicion parazgjedhor.
“Në fakt nuk ka përfunduar asgjë, Pacolli është duke zhvilluar negociata me kryetarin e LDK-së për një garë të mundshme së bashku. Kontakte kemi pasur edhe me partitë tjera, por më të avancuara janë me LDK-në edhe për shkak të afërsisë ideologjike që kemi me ta, por edhe për shkak të bashkëpunimit të mëhershëm”, ka thënë Zyberaj.
Por, sipas analistit, Faton Mehmeti, Lidhja Demokratike e Kosovës duhet të garojë e vetme në zgjedhje.
“LDK do të duhet të garonte e vetme në zgjedhje, besa nuk është çudi fare që pas AKR të bëj koalicion edhe me Nismën, nëse kjo e fundit nuk arrin të futet në koalicion me PDK-në”, shprehet analisti Mehmeti.
Ai shton se Nisma dhe AKR kërkojnë gjithmonë zgjidhje tek partitë e mëdha.
Analisti Mehmeti paralajmëron LDK-në, nëse kjo e fundit bën koalicion me AKR-në.
“LDK nuk përfiton asgjë nga AKR, derisa kjo e fundit po e përdor LDK-në si mjet për të mos u shuar. Pra, LDK po e shpëton nga " zhakja" partinë e Pacollit, e cila nuk ka mbështetje askund. Mendoj se me AKR, apo edhe me NISMËN, LDK, por jo vetëm LDK, por secila nga partitë e mëdha nuk përfitojnë asgjë, vetëm zemërojnë qytetarët që po i mbajnë " gjallë" akoma partitë, të cilat ata nuk i dëshirojnë, andaj edhe janë drejt zhdukjes”, përfundon analisti politik, Faton Mehmeti.