Pavarësia e Kosovës, e shpallur më 17 shkurt 2008, është njohur nga shumica e vendeve demokratike të botës, megjithëse procesi i njohjeve ndërkombëtare vazhdon ende në disa shtete të Bashkimit Evropian, përfshirë Greqinë.
Lidhur me këtë, Këshilli për Marrëdhënie Shqiptaro-Amerikane (AARC) ka ndërmarrë një nismë duke u takuar me kongresisten amerikane me prejardhje greke, Nicole Malliotakis.
Sipas njoftimit të presidentit të AARC-së, Martin Vulaj, një nga temat kryesore të bisedës ka qenë inkurajimi i afrimit më të madh mes Athinës dhe Prishtinës, i cili në perspektivë mund të hapë rrugën drejt njohjes zyrtare të Kosovës nga Greqia.
“Një nga temat kryesore të diskutimit ishte forcimi i marrëdhënieve mes Greqisë dhe Kosovës dhe inkurajimi i bashkëpunimit më të ngushtë që në të ardhmen mund të çojë drejt njohjes zyrtare të Kosovës nga Greqia”, thuhet në komunikatën e AARC-së.
Në të njëjtin njoftim theksohet edhe dimensioni i mbështetjes së gjerë pro-amerikane në rajon, duke veçuar Kosovën si një nga shoqëritë më pro-SHBA në botë, si dhe Shqipërinë dhe komunitetet shqiptare në Maqedoninë e Veriut e Mal të Zi, të cilat sipas AARC-së kanë dëshmuar vazhdimisht përkushtim ndaj Shteteve të Bashkuara dhe aleancës transatlantike.
“Ne theksuam se Kosova mbetet një nga shoqëritë më pro-amerikane në botë, ndërsa Shqipëria dhe komunitetet shqiptare në Maqedoninë e Veriut dhe Mal të Zi kanë dëshmuar vazhdimisht mbështetje të fortë për Shtetet e Bashkuara dhe aleancën transatlantike”, thuhet më tej në deklaratë.
Ndryshe, delegacioni i AARC-së në këtë takim është përbërë nga kryetari Eli Rusi, nënkryetari Tony Marke, sekretari Burim Rexhaj, si dhe anëtarët e bordit Agim Jusufi dhe Vehbi Bajrami.
Ekspertët e marrëdhënieve ndërkombëtare vlerësojnë se përpjekjet e lobimit për njohjen e Kosovës nga Greqia përbëjnë një zhvillim me peshë të veçantë në procesin e konsolidimit të shtetësisë dhe avancimit diplomatik të Kosovës.
Sipas tyre, një njohje eventuale nga Greqia do të përfaqësonte një hap të rëndësishëm për forcimin e pozitës ndërkombëtare të Kosovës dhe mund të ndikonte në dinamizimin e procesit të njohjeve edhe nga shtetet e tjera të Bashkimit Evropian që ende nuk e kanë njohur.
ata vlerësojnë edhe rolin e lobit shqiptaro-amerikan në SHBA, duke e cilësuar atë si faktor me ndikim të vazhdueshëm në çështjen e Kosovës, si në të kaluarën ashtu edhe në zhvillimet aktuale
Arifi: Njohja e Greqisë do të zhbllokonte procesin e njohjeve në BE
Ish-diplomati, Avni Arifi në një prononcim për “Bota sot” ka shprehur mirënjohje për punën që po bën AARC, duke e cilësuar atë si të rëndësishme për avancimin e pozitës ndërkombëtare të Kosovës.
“Jashtëzakonisht mirënjohës për punën e madhe që po bën AARC. Njohja e Greqisë do të ishte një hap tepër i madh në kompletimin e shtetësisë së Kosovës dhe një shtytje shtesë për debllokimin e procesit të njohjeve nga pesë vendet e BE-së”, ka vlerësuar ai.
Gjithashtu, Arifi ka theksuar rëndësinë e Greqisë si aktor rajonal, duke nënvizuar se kontaktet e tilla kanë peshë politike.
“Greqia është një vend i rëndësishëm dhe kontaktet e tilla nga AARC dhe njohja potenciale, pavarësisht se po bëjnë punën që Qeveria e Kosovës do të duhej ta bënte, i nderon ata dhe nderon kombin”, ka thënë Arifi për “Bota sot”.
Lama: Greqia do të veprojë sipas interesave të saj në rajon
Ndërkaq, edhe ish-diplomatja Alma Lama ka vlerësuar rolin e lobit shqiptaro-amerikan në Shtetet e Bashkuara, duke e konsideruar atë si faktor të rëndësishëm historik dhe aktual.
“Mendoj se lobi shqiptaro-amerikan ka luajtur rol të rëndësishëm në SHBA si në të shkuarën edhe tani. Lobimi për njohjen e Kosovës nga Greqia në Kongres është lajm i mirë, por me siguri shteti grek do të vendosë sipas interesave në rajon”, është shprehur ajo për “Bota sot”.
Ajo ka shtuar se ndikimi amerikan mbetet faktor kyç në zhvillimet diplomatike.
“Natyrisht, SHBA ka mundësi të ndikojë që Greqia të lëvizë pozicionin e saj aktual diplomatik ndaj Kosovës”, ka thënë Lama për “Bota sot”.