Australianët kanë reaguar me zemërim dhe mllef ndaj lajmit se tenisti serb Novak Gjokoviq do të luajë në Australian Open, pasi atij iu lejua të marrë pjesë në grand slamin e parë të vitit edhe pa qenë i vaksinuar.
Për të marrë pjesë në këtë turne, të gjithë lojtarët dhe stafi i turneut janë të detyruar të ofrojnë dëshmi se janë të vaksinuar apo se përbejnë përjashtim mjekësor nga vaksinimi.
Organizatori i turneut pretendon se tenisti serb nuk është trajtuar në mënyrë të veçantë.
Por australianët – shumë prej të cilëve ende nuk mund të udhëtojnë brenda shtetit apo në botë – i kanë kritikuar ashpër zyrtarët e turneut, politikanët e vendit dhe vetë Gjokoviqin.
Shefi i Australian Open Craig Tiley tha se 26 atletë kishin aplikuar për përjashtim mjekësor dhe se vetëm një numër të vogël prej tyre i është pranuar kërkesa në përputhje me rregulloret e vendosura nga qeveria federale.
Australianët në përgjithësi janë ankuar pse Gjokoviqit iu lejua pjesëmarrja, pasi në dy vitet e fundit ata janë përballur me kufizime tejet të ashpra, si vaksinimi i obliguar, testimet e shpeshta, izolimi dhe ndalesa e udhëtimit.
Shumë prej tyre janë ankuar se kanë harruar kur i kanë takuar të afërmit e vet për shkak të kufizimeve të ashpra në vend.
